Хĕрарăмсем наукăра ют мар

И.Н.Ульянов ячĕллĕ ЧПУра "Ăслăлăх _ хĕрарăмсен куçĕпе" çавра сĕтел иртнĕ. Ăна Хĕрарăм ученăйсен пĕтĕм тĕнчери кунне халалланă. Унта вĕрентÿ тата культура министрĕсем Дмитрий Захаровпа Светлана Каликова, Хĕрарăмсен канашĕн ертÿçи Наталья Николаева, ЧПУ ректорĕ Андрей Александров, хĕрарăм директорсемпе тĕпчевçĕсем, общество хастарĕсем хутшăннă. "Ăслăлăхра тăрăшакан хĕрарăмсен йышĕ 54 процентпа танлашать. Вӗсем наукăра сахал мар çитĕнÿ тăваççĕ,  ĕçĕсем тĕрлĕ отрасльте пысăк вырăн йышăнаççĕ", _ палăртнă çавра сĕтеле хутшăннисем. ЧПУра та хĕрарăм ученăй чылай.

Халăх умне кĕркунне кăларĕç

Сăрпа Хусан хӱтĕлев чиккисене тăвакансен паттăрлăхне халалласа опера лартаççĕ. Ăна хатĕрлеме Чăваш  Ен Пуçлăхĕн хушăвĕпе Чăваш патшалăх оперăпа балет театрне 5 миллион тенкĕлĕх грант уйăрса панă. Пултарулăх хайлавĕн хăш-пĕр сыпăкне Ҫĕнтерӳ кунĕ тĕлне хатĕрлесе çитерме тĕллев лартаççĕ оперăна калăплакансем. Авторсен ушкăнне Мускав патшалăх филармонийĕн илемлĕх ертӳçи Александр Чайковский ертсе пырать. Композиторсем опера лартма историри пулăмсене, архив докуменчĕсене, окоп чавнă çынсен аса илĕвĕсене тĕпе хывĕç. Оперăна халăх умне кĕркунне кăларĕç.

Чăваш Ен мăнаçлăхĕ – сăнсенче

Республикăра «Астăвăма сутмаççĕ…» /«Памяти верны»/ кубока кам тивĕçессине çулталăк тăршшĕпе палăртĕç. Çакă «Чăваш Ен мăнаçлăхĕ — сăнсенче» проектпа  килĕшӳллĕн иртĕ. Мухтавлă ентешсен çулталăкне халалланă проекта республикăри вĕренӳ учрежденийĕсем хастар хутшăнаççĕ. Кашни уйăх пуçламăшĕнче шкулсенче сĕннĕ темăпа интерактивлă урок иртĕ, вĕренекенсем тăван енĕн мухтавлă çыннисем çинчен пĕлĕç. Çавăн пекех музыкăпа литература композицийĕсен конкурсĕсем, куравсем, тĕл пулусем, тĕрлĕрен фестивальпе ăмăрту пулĕ. Март уйăхĕнче мероприятисем «Чăваш çĕрĕ талантсемпе пуян» ятпа иртĕç. Уйăх вĕçĕнче вара ача-пăча театр фестивалĕ пулмалла. Çавăн пекех ĕç династийĕсен фестивалĕ, Сăр чиккине чавнă вырăнсенчи истори реконструкцийĕ, «Чăваш Енĕн мухтавлă çыннисем» республика диктанчĕ тата ытти мероприяти йĕркелеме палăртнă.

Коронавируспа кӗрешме -хушма укҫа

ЧР Министрсен Кабинечӗн ларӑвӗнче патшалăхăн «Сывлăх сыхлавне аталантарасси» программине улшăнусем кĕртессине çирĕплетнĕ. Сăлтавĕ коронавируспа çыхăннă. Унпа кĕрешмешкĕн федераци бюджетĕнчен дотаци уйăрнă. Çапла вара программа тата 624,5 миллион тенкĕлĕх хакланнă. Хушăмăн самай пысăк пайĕ — шăпах федераци укçи.

Кун йĕркинче сывлăх сыхлавнех пырса тивекен тепĕр ыйту та пулнă — медицинăн пуçламăш сыпăкне çĕнетмелли программăна улшăнусем кĕртнĕ. Çакă та укçапах сăлтавланнă. Тӳрлетӳсем уйрăм мероприятисен хакне улăштарссине пырса тивнĕ, анчах программăн пĕтĕмĕшле хакĕ улшăнми юлнă.