КĂРА коронавирус чирĕ парăнни сисĕнмест. Районта та унăн серепине çакланакансем йышланса пыни хăрушлăхран асăрханмалли мелсене малалла та пăхăнмаллине тепĕр хут çирĕплетет. Унтан хỹтĕленме е ăна çăмăлтарах ирттерсе яма пулăшакан шанчăклă мел - организма вакцина яни. Çак кунсенче çеç ỹпкисем 100 процент сиенленнĕ Поликарповсем Патăрьелĕнчи тĕп больницăран сипленсе тухнă. Мăшăра чире çăмăллăн парăнтарма шăпах вĕсем маларах вакцина тутарни пулăшнă. Каçал тăрăхĕнчен килнĕскерсем паян пирĕн районти тĕп больницăра хăйсене сипленĕ тухтăрсене тав сăмахĕ каласа пĕтереймеççĕ. Йывăр чире çаклатнă хĕрарăм сиплев учрежденийĕнчен икĕ эрнерен, çемье пуçлăхĕ 21 кунтан сывалса тухнă.

"Вакцина туманнисен çакнашкал диагнозпа икĕ-виçĕ хут ытларах сипленме, чире йывăрпа парăнтарма тивет. Кун пек тĕслĕх пирĕн пĕрре мар пулчĕ. Вĕсене пурне те коронавирусран прививка тутарни чире çăмăллатма пулăшрĕ",- пĕлтерчĕ Патăрьелĕнчи тĕп больницăри инфекци уйрăмĕн заведующийĕ Антонина Чернова паянхи кун вакцинăн пĕлтерĕшне хак парса.