Социаллă тытăмра çĕнĕлĕхсем пулĕç

Халăха ĕçпе, социаллă хӳтлĕхпе тата пулăшупа тивĕçтерес тĕлĕшпе 2022 çулта пулакан улшăнусем çинчен  ЧР ĕçлев тата социаллă хӳтлĕх министрĕ Алена Елизарова каласа панă. «Чăваш Ен Пуçлăхĕ Олег Николаев ЧР Патшалăх Канашне янă Çырура регионти социаллă тӳлевсене инфляци виçипе шайлаштарма тĕллев лартрĕ, — тенĕ министр кăçалхи çĕнĕлĕхсемпе паллаштарнă май. — Хальхи вăхăтра республика ертӳçин хушăвне пурнăçа кĕртме кирлĕ право акчĕсен проекчĕсене хатĕрлес тĕлĕшпе ĕçлеççĕ. Çак ĕç-хĕле вĕçленĕ хыççăн ачасене, опекунсене, ĕç ветеранĕсене, тыл ĕçченĕсене, политика репрессийĕсенче шар курнисене паракан тӳлевсене индексацилĕç. Асăннă тӳлевсене февраль 1-мĕшĕнчен ӳстернĕ виçепе март-апрель уйăхĕсенче илме тытăнĕç».

Улатӑр районӗнче турбаза çĕкленĕ

 ЧР Министрсен Кабинечӗн ларӑвӗнче правительство ял хуçалăх таварĕсем туса кăларакансене ял туризмне аталантарма грантсем памалли йĕркене çирĕплетнĕ.  Улатăр районĕнче «Симĕс çаран» турбаза йĕркелемелли заявкăна РФ Ял хуçалăх министерстви ырланă. Çакăн çинчен ларура регион ертӳçи пĕлтернĕ. Сăмах пулă ĕрчетес енĕпе ĕçлекен Юрий Аверьянов фермер проекчĕ пирки пырать, ăна «Агротуризм» гранчĕпе пулăшса кăçал пурнăçлама суйласа илнĕ. Ку — патшалăх пулăшăвĕн çĕнĕ инструменчĕ. 3 миллион тенкĕпе муниципалитет территорийĕнче хăна çурчĕ тăвĕç, ачасен тата спорт площадкисене йĕркелĕç.

«Кӗмӗл ҫутиллӗ хирсем» кӗнеке пичетленсе тухнӑ

Чӑваш кӗнеке издательствинче Петӗр Яккусенӗн «Кӗмӗл ҫутиллӗ хирсем» кӗнеки пичетленсе тухнӑ. «Унта, тӗпрен илсен, паллӑ поэтӑн иртнӗ ӗмӗрӗн 80-мӗш ҫулӗсенче ҫырнӑ, анчах ку таранччен ниҫта та пичетленмен хайлавӗсем кӗнӗ», — тесе хыпарланӑ издательство сайтӗнче. Петӗр Яккусен (Петр Яковлевич Яковлев) 1950 ҫулхи августăн 26-мӗшӗнче Красноармейски районӗнчи Упаҫырми ялӗнче ҫуралнӑ. И.Н. Ульянов ячӗллӗ Чӑваш патшалӑх университетӗнчен вӗренсе тухнӑ. Филологи ӑслӑлӑхӗсен кандидачӗ. Наукӑпа тӗпчев институтӗнче, Красноармейски тата Элӗк районӗсенчи шкулсенче, Чӑваш патшалӑх университетӗнче ӗҫленӗ. Вӑл 2021 ҫулхи январӗн 7-мӗшӗнче ҫӗре кӗнӗ.

Тĕп пасар çуннă

Февралӗн 11-мӗшӗнче, ҫӗрле Шупашкарта Тӗп пасар ҫуннӑ. Унта лавккасем вырнаҫнӑ икӗ хутлӑ ҫуртра ҫулӑм тухнӑ. Чӑваш Енри Инкеклӗ лару-тӑру министерстви пӗлтернӗ тӑрӑх, пасарти пилӗк павильон сиенленнӗ. Пӗтӗмпе 100 тӑваткал метр. Юрать-ха, ҫулӑм икӗ хутлӑ ҫурта йӑлтах тӗп туман. Пушара сӳнтерме 2 сехет кирлӗ пулнӑ. Ҫулӑмпа 24 пушарнӑй, 6 техника кӗрешнӗ. Малтанлӑха пӗлтернӗ тӑрӑх, пушар электрохатӗрпе тӗрӗс усӑ курманран тухнӑ.