2021 çулхи ĕç-хĕлпе паллаштарнă

Чăваш Ен Пуçлăхĕ Олег Николаев  февралĕн 17-мĕшĕнче Патшалăх Канашĕн депутачĕсене Министрсен Кабинечĕн 2021 çулхи ĕç-хĕлĕн пĕтĕмлетĕвĕпе паллаштарнă. Ку пĕлтерĕшлĕ мероприятие Чăваш Ен Наци телерадиокомапнийĕ туллин çутатнă.               

Ҫĕнĕ музей

Шупашкарти 22-мĕш шкулта «Маэстро» позывной» музей уçăлнă. Ăна РФ Геройне Николай Гаврилова халалланă. Çĕнĕ музейпе ЧР Пуçлăхĕ Олег Николаев, РФ Геройĕсем Вячеслав Бочаров, Юрий Недвига, Алексей Романов, Евгений Борисов тата ыттисем паллашнă. Музейре генералăн пурнăçĕпе, ĕçĕ-хĕлĕпе паллаштаракан япаласем: офицер тумĕсем, докуменчĕсем, наградисем, сăн ӳкерчĕксем тата ытти вырăн тупнă. «Эпир хамăр ентешпе мухтанатпăр. Шкул ачисем унран тĕслĕх илеççĕ. Кадет класĕсенче пĕлӳ илекен ачасенчен чылайăшĕ хăйсен шăпине çарпа, авиаципе çыхăнтарасшăн», — тенĕ шкул директорĕ Надежда Шестакова.

Кĕрхи калчашăн кулянмалла мар

Республикăра кĕрхи тырă калчи мĕнле хĕл каçнине специалистсем тĕрĕслесех тăраççĕ. Раççей ял хуçалăх центрĕн Чăваш Енри филиалĕн ертӳçи Сергей Павлов палăртнă тăрăх, юлашки 20 çулта кăçалхи пек ăшă февраль уйăхĕ пулман. Юр çусах тăрать, тата 19 мм чухлĕ хулăнланчĕ. Уйăхри вăтам температура 6 градус сивĕпе танлашать. Хирсенчи юр тарăнăшĕ 35-60 см. Çĕр 25-50 сантиметр таран шăннă. Калча шăтнă вырăнти çĕр температури — 0,8-0,9 градус сивĕ. Специалистсем тырă шăтаслăхне тĕрлĕ вырăнта тĕрĕсленĕ хыççăн «тивĕçтерет» /49,7%/ тата «лайăх» /49,4%/ паллăсемпе хакланă.

Пине яхăн ача килĕ

Кăçалхи июнĕн 25-27-мĕшĕсенче Чăваш Ене çĕршыври тĕрлĕ халăх ачи  пуçтарăнĕ. Раççейри халăхсен культура еткерлĕхĕн çулталăкĕнче çĕршывра пĕрремĕш хут ача-пăча фольклориади пулĕ. Çак мероприятие ирттерме Чăваш Ене суйланă. Ку фестиваль Раççей халăхĕсен культура пуянлăхне кăтартса парĕ. Делегацисем урамра утса та, юрă-ташăпа та, алă ĕçĕсемпе те савăнтарĕç. Çавăн пекех флешмоб, çавра сĕтел тата туслăх каçĕ ирттерме палăртнă.

Стикер ӱкереççĕ

Хăйне евĕрлĕ стикерсен конкурсне «Сферум» платформăпа VK компани 1-11 классенче вĕренекенсем валли ирттереççĕ.

Февралĕн 7-мĕшĕнчен пуçласа мартăн 14-мĕшĕччен ачасен хăйне евĕрлĕ стикер ӳкерсе «Контактра», Instagram е TikTok социаллă сетьсенче хăйсен уçă страницисене вырнаçтармалла, #мойсферум хештэг палăртмалла. Çĕнтерӳçĕсене апрелĕн 14-мĕшĕ тĕлне суйлĕç, чи лайăх ĕçсен авторĕсене парнесемпе чыслĕç. çĕнтерӳçĕсен стикерĕсене вĕрентӳ платформин чатне кĕртĕç.

Сăвăрсем вăраннă

А. Николаев ячĕллĕ Шупашкарти паркра пурăнакан сăвăрсем вăраннă. Ытти çулхисенчен чылай маларах. Чĕр чунсем сывлăш температури  хăпарсан вăранаççĕ. Парк администраций.нчен пĕлтернĕ тăрăх сăвăрсем çулленех ыйхăран март уйăхĕнче вăраннă. Кăçал маларах вăраннине çуркунне иртерех килессипе çыхăнтараççĕ.

Суя шăнкăравсем

Шупашкарти 18 шкулпа электромеханика колледжĕн икĕ корпусĕнче эвакуаци ирттернĕ. Ачасемпе вĕрентекенсене тата кунта ĕçлекенсене хăвăрттăн илсе тухса юнашар вырнаçнă пĕлӳ çурчĕсене ăсатнă. Кинологсем кашни вĕренӳ заведенине тĕрĕсленĕ, сирпĕтекен хатĕрсене тупса палăртман.