ФЕВРАЛĔН 15-мĕшĕнче Тăван çĕршыв тулашĕнче çар тивĕçне пурнăçланă Раççей салтакĕсене асăнмалли кун пулчĕ. Афганистанра служба тивĕçне пурнăçланисем çулсеренех çак кун пĕрле пуçтарăнаççĕ, çитĕнекен çамрăк ăрупа тĕл пулусем йĕркелеççĕ, çĕршывшăн çăмăл мар тапхăра аса илеççĕ тата ытти те. Тури Туçари спорт ветеранĕ, 2016 çулта Чăваш Республикинче ветерансем хушшинче йĕркеленĕ ăмăртура 10 çухрăма тата 400 метра чупассипе икĕ хутчен бронза медале тивĕçнĕ Валерий Салмин афганец-ветерансене сума суса тăван ялтан Елчĕк районĕнчи Тимеше çитиччен çуран утса çаврăннă, унти чиркĕве кĕрсе вăрçăран таврăнайман паттăрсен канлĕхĕшĕн çурта çутнă.

 –Паттăрсем хыпарсăр çухалмаççĕ, вĕсен ячĕ те вилĕмсĕр. Афганистан вăрçине пирĕн ялтан та çамрăксем хутшăннă. Çак кунхине Туçа шкулĕнче шăпах вĕсемпе тĕл пулу йĕркелерĕç, эпĕ вара хамăн ырă йăлапа 20 çухрăма çуран утса парăнтартăм,- кăмăлтан каласа парать саккăрмĕш теçеткене ваклакан Валерий Иванович.