КУН ПЕК тĕслĕхе ялсенче час-часах асăрхама пулать. Кил хуçисем кунĕпе те çĕрĕпе, çулталăкĕпе кăкаркăчра тăракан анчăксене ирĕке уçăлма кăларса яраççĕ. Хăрушлăх пирки шутламаççĕ темелле-ши? Тăватă ураллă туссем вара ун пек чухне урамра хуçаланмаллипех хуçаланаççĕ. Унталла та кунталла антăхса кайсах чупаççĕ, иртен-çỹрен çумне те çулăхаççĕ... Вăл çеç те мар-ха, вĕсене çыртса илме те пултараççĕ. Нумай пулмасть Вăтаел ялĕнче çапла пулса тухнă та. Çемье пуçлăхĕ кил картинчен юрне тасатнă чухне йыттине кăкаркăçран вĕçертсе янă. Куç умĕнче, никама хăратмĕ, каланине итлĕ тенĕ пулас. Анчах анчăкăн хỹри кукăр теççĕ. Çакскер урамра асламăшĕпе пыракан мăнукĕ патне пынă та ăна çыртса илнĕ... Юрать-ха инкек синкерлĕ вĕçленмен, пĕчĕк хĕрача та хăрушлăхра мар.