ИРТНĔ шăматкун, февралĕн 12-мĕшĕнче, Шăнкăртамри пĕр хуçалăхра пушар тухнă. Канмалли кун кил хуçисем ытти чухнехи пекех мунча хутнă. Анчах мăрьерен çулăм тухса тăракан çурăка асăрхаман. Инкекĕн сăлтавĕ те çакăнпах çыхăннă. Мунчара пурте çăвăнса тухнă хыççăн пĕр-икĕ сехетренех унтан тĕтĕм йăсăрланма пикеннĕ, вут хыпса илнĕ. Юрать-ха, ăна вăхăтра асăрханă, малалла алхасма паман. Районти пушар надзорĕнчен пĕлтернĕ тăрăх ку таранччен Юхмапа Пăла тăрăхĕнче шута илнĕ пилĕк пушартан иккĕшĕ шăпах мунча хутнă чухне хăрушсăрлăх йĕркине пăхăнманнипе çыхăннă. Маларах çакнашкал пăтăрмах Кивĕ Ахпỹртре пулнă.