Февралĕн 24-мĕшĕнче Раççей Президенчĕ Владимир Путин Донбасс территорине хỹтĕлес тĕллевпе çар операцийĕ пуçарса яни пирки пĕлтернĕ. Çакна Донецк тата Луганск çыннисене хăтарас тĕллевпе тăвассине уççăн палăртнă Владимир Владимирович.

Пирĕн республикăра та ятарлă йĕрке çирĕплетнĕ. Ăна Донецк тата Луганск халăх республикисен çыннисене кĕтсе илессипе тата вырнаçтарассипе йышăннă правительство. Çывăх кунсенче Чăваш Ене Донбасран 300 ытла çын килсе çитмелле тесе пĕлтереççĕ Чăваш Республикин сывлăха сыхлас ĕç министерствинчен. Вĕсене вырнаçтарма "Лесная сказка" тата "Алый парус" санаторисенче вырăнсем йĕркеленĕ. Çынсене вĕри апатпа тата мĕн кирлипе тивĕçтерĕç.

Шупашкарта Донецк тата Луганск тăрăхĕсен çыннисене валли гуманитари пулăшăвĕ пухакан центр уçнă. Вăл Ача-пăча пултарулăх керменĕнче (Шупашкар хули, Президент бульварĕ, 14-мĕш çурт) вырнаçнă. Вăл кашни кун, вырсарникунсăр пуçне, 10-16 сехетсенче ĕçлет. Çĕнĕ тумтир, ĕçмелли шыв, кăкăр ачисем валли ятарлă апат, чей, сахăр, кĕрпе, консерва, çăвăнмалли, çывăрмалли япаласем, кĕнекесемпе канцтаварсем йышăнаççĕ центрта.

А. ИЛЬИН