КĂÇАЛХИ хĕл пирĕн тăрăха кăмăл туличченех юрпа савăнтарчĕ. Çавна май шурă пустав çурт тăррисене те питĕ хулăн выртрĕ. Çанталăк ăшăтса пынă май юр катрамĕсем пайăн-пайăн сахал мар шуса анчĕç-ха. Çав вăхăтрах çĕр çине ỹкме хатĕрленекен купасем те сахал мар. Çавăнпа та патшалăх çуртĕнче е уйрăм хуçалăхпа пурăнакансен хăрушлăха сирес тĕллевпе вĕсене тасатса антармалла, çуртсене пăхса тăракан коммуналлă хуçалăхсен те ку тĕлĕшпе яваплăха туйса ĕçлемелле. Çуран иртсе çỹрекенсен вара çуртсен хĕррипех утма тăрăшмалла мар. Ăшăнса вырăнтан хускалакан катрамсем ăнсăртран хупласа хума та пултараççĕ. Çакна та асăрхаттарса хăвармалла. Юр антарма хăпарнă чухне пурин те ĕç хăрушсăрлăх йĕркине çирĕп пăхăнмалла.