Февралĕн 21-мĕшĕнчен пуçласа антителăллă çынсене QR-код пама тытăннă. ЧР Цифра министрĕ Кристина Майнина каланă тăрăх, юн анализне Шупашкарти 16 лабораторире илеççĕ. «Тепĕр 2-3 кунран Патшалăх пулăшăвĕсен порталĕнче QR-код йĕркеленет. Ăна харпăр кабинечĕ урлă кĕрсе пăхмалла. Порталта регистрациленменнисен МФЦна каймалла. Ку QR-кода коронавируспа чирлеменнисемпе вакцинаци туманнисем илееççĕ. Ăна ултă уйăхлăха параççĕ. ИФА анализа тӳлевлĕ тăваççĕ. Маларах тест панисене те шута илеççĕ. QR-код анализ панă кунран ĕçлеме пуçлать», — пĕлтернĕ Кристина Андреевна.

Тĕрĕслев ĕçне электрон майпа та çырма пулĕ

 Мартăн 15-мĕшĕнчен пуçласа майăн 20-мĕшĕччен çĕршыври шкулсенче Пĕтĕм Раççейри тĕрĕслев ĕçĕсем /ВПР/ иртĕç. 4-мĕш класра вĕренекенсен — виçĕ, 5-мĕшсен тăватă предметпа çырмалла пулĕ. 6-8-мĕш классенче 2 предметпа /вырăс чĕлхипе математика/ пурин те тĕрĕслеве хутшăнмалла, тепĕр икĕ предмета вара — суйламалла. 10-11-мĕш классем тĕрĕслев ĕçне пуш уйăхĕн 1-25-мĕшĕсенче ирттерĕç — хăш кунне кашни шкул хăй палăртать. Кăçал республикăра 394 вĕренекен ВПР çырĕ. Хальхинче ĕçсене компьютерпа та пурнăçлама пулĕ. Сăмахран, Чăваш Енри 62 шкулта 1 е 2 предметпа тĕрĕслев ĕçне электрон майпа çырасшăн.

Пассажирсене турттарас йĕрке улшăнĕ

 Республикăра общество транспорчĕпе çул-йĕре тĕпчеме палăртнă. Çак тĕллевпе кунта пурăнакансен шухăшне пĕлесшĕн. Чăваш Республикинчи транспорт министерстви хушнипе ятарлă организацисем /ЦЭИ тата OTS Lab/ республикăра тата Шупашкар хула агломерацийĕнче транспорт çӳретессин проектне хатĕрлеççĕ. Чăваш Енре пурăнакансем хăйсен шухăшне чувашия-транспорт.рф порталта пĕлтерме пултараççĕ.

 Вăрманăн та руна палли пур

Туристсем валли «Рунă çулĕ» маршрут хатĕрлес ĕçе «Чăваш вăрманĕ» наци паркĕ те хутшăнать. Çавăнпа та вăрманăн хăйĕн рунă палли пулмалла. Ăна суйласси вăраха тăсăлман. Унăн эмблеминче авалхи чăвашсен рунă палли пур, вăл йывăçа, çут çанталăкпа хутшăннине пĕлтерет. «Рунă çулĕ» çавăн пекех Карелие, Комие, Мари тата Мордва Республикисене, Пермь крайне, Ульяновск облаçне, Хакасипе Алтая, Тывана тата Бурятипе Якутие çыхăнтарма тивĕç. Проекта хутшăнса «Чăваш вăрманĕ» наци паркĕ çулталăк тăршшĕпе этнографи мероприятийĕсем ирттерĕ. Пур турист та чăваш йăли-йĕркин «Пархатар» комплексне çитсе курĕ. Унта вĕсене çулталăк вăхăчĕсене сăнлакан 4 кӳлепе тата 12 уйăха кăтартса паракан скульптурăсен ушкăнĕ кĕтсе илĕ.

Пушкин карттипе 45 млн тенкӗлӗх билет сутнӑ

Республикӑри культура учрежденийӗсем Пушкин карттипе билет сутса пӗтӗмпе 45 миллион тенкӗ ӗҫлесе илнӗ. Пӗлтӗрхи сентябрь уйӑхӗнченпе республикӑра 125 пин билет сутнӑ. Пӗр билет хакӗ вӑтамран 360 тенкӗпе танлашнӑ. Вырӑс драма театрне илес тӗк, вӑл ҫӗршывра Пушкин карттипе билет сутас енӗпе лидер. Унта ку таранччен карттӑпа 24 пин ытла билет туяннӑ. Аса илтеретпĕр: Пушкин карттипе 14-22 ҫулсенчи ҫамрӑксем усӑ курма пултараҫҫӗ. Ку программа пӗлтӗр сентябрĕн 1-мӗшӗнче пурнӑҫланма тытӑннӑ. Ун чухне 3 пин тенкӗ хурса панӑ. Кӑҫал вара Пушкин картти ҫинче - 5 пин тенкӗ. Ку укҫана культура мероприятийӗсене кайса ҫеҫ тӑкаклама пулать.