Обществăлла секторти, фермер тата харпăр хуçалăхсенчи выльăх- чĕрлĕхе пăхса тăрас тĕлĕшпе районти ветеринари служби иртнĕ çул сахал мар ĕç турĕ.

 Чăваш Республикин Патшалăх ветеринари служби палăртнă тĕллевсене пурнăçа кĕртессине мала хутăмăр. Ерекен чирсене хирĕçле мероприятисене вăхăтра туса пынăран вĕсене сарăлма памарăмăр. Пирĕн тăрăхра туберкулез, бруцеллез, çĕпĕр язви, урмăш чирĕ, сысна чуми, кайăк-кĕшĕк грипĕ тата ыттисем те тĕл пулмарĕç.

Специалистсем чирсем ан сарăлччăр тесе, туса илекен продукци çын пурнăçĕшĕн хăрушлăх ан кăлартăр тесе те нумай вăй хучĕç. Çавăн пекех ял тăрăх пуçлăхĕсемпе, ял хуçалăх тата фермер хуçалăх ертỹçисемпе пĕр-пĕрне ăнланса ĕçлени те витĕм кỹчĕ.

 Пирĕн тĕп тĕллев - чирсене хирĕç кĕрешесси, çавна май профилактика, диагностика тишкерĕвĕн мероприятийĕсене пур хуçалăхра та планпа палăртнă чухлĕ ирттернĕ. Ку енĕпе уйрăмах Первомайскинчи, Шăнкăртамри, Туçари лечебницăсем (заведующийĕсем Н. Трофимова, И. Шамшетдинова, В. Быков), Сăкăтри, Ишлĕри, Аслă Чементи, Турханти, Кзыл Чишмари ветучастоксем (Т. Чумакова, Е. Зверева, Т. Семенова, С. Пятаков, Х. Хамматов) ăнăçлă вăй хунине палăртмалла.

Выльăхсен сывлăхĕ пĕр ветеринари службинчен кăна килмест. Вĕсене мĕнле условисенче усранин, апат пахалăхĕ тата ăна мĕн чухлĕ çитернин, чир-чĕр лекмелле мар çирĕп условисем тунин, профилактика мероприятийĕсене пăхăннин те витĕмĕ пысăк.

Районти ял хуçалăх кооперативĕсем, фермер хуçалăхĕсем тата харпăр хуçалăхсем выльăх-чĕрлĕхрен пахалăхлă сĕт, аш-какай тата ыттине те туса илесси пирки тăрăшаççĕ. Паян районта сĕт пухакан 10 предприяти, выльăх пусса тирпейлекен 11 пункт ĕçлет. Эпир вара продукцие тĕрĕслесе, çиме юрăхлă пулни çинчен тивĕçлĕ документсем хатĕрлесе паратпăр.

2021 çулта республика бюджетĕнчен уйăрнă укçапа выльăхсене искусствăлла майпа йăхтаракан комплект - "Лада Нива Травел" çăмăл автомашина, УЗИ-скане, Дьюар савăчĕ, ноутбук, техник-осеменатора кирлĕ япаласене пухнă чăматан - туянтăмăр. Хальхи вăхăтра выльăх йăхтарассипе 8 пункт ĕçлет. Кăçал Çĕньялти ветеринари участокĕнче уçрăмăр.

Ял хуçалăх кооперативĕсенчи ветеринари специалисчĕсем те хăйсене шаннă тивĕçе туллин пурнăçлаççĕ. "Батыревский" пĕрлешỹри Д. Аврелькин ветврача, "Исток" çĕр ĕç фирминчи Р. Ахмерова тата ыттисене те палăртмалла. Малашне те пур резервсемпе пирĕн туллин усă курмалла. Чир-чĕртен профилактика мероприятийĕсене вăхăтра йĕркелемелле, çĕнĕ технологисене пурнăçа кĕртмелле тата кадрсем пирки те манмалла мар.

П. ЕФИМОВ, районти выльăх-чĕрлĕх чирĕсемпе кĕрешекен станци начальникĕ