Финал Шупашкарта иртĕ

Кун пирки Чăваш Республикин Пуçлăхĕ Олег Николаев Мускавра çĕршыври шахмат  федерацийĕн ертӳçипе Александр Ткачевпа ĕçлĕ тĕл пулу ирттернĕ май пĕлтернĕ. Ăмăртусем Чăваш патшалăх ӳнер музейĕнче сентябрь уйăхĕнче иртĕç. Турнир парнисене çĕнсе илессишĕн Шупашкарта Раççейри чи ăста шахматçăсем тупăшĕç.

Ҫĕнĕ пособие май уйăхĕнче тӳлеме пуçлĕç

Сахал тупӑшлӑ ҫемьесенче ҫитĕнекен 8-16 çулсенчи шкул ачисем валли ҫӗнӗ пособие май уйăхĕнче тӳлеме тытӑнӗҫ. Кун пирки Раççейĕн премьер-министрĕ Михаил Мишустин пӗлтернӗ. Пособие май уйăхĕнче тин тӳлеме пуҫлаҫҫӗ пулин те, апрель уйăхĕнченех шутласа парӗҫ.

Тĕрĕслев пырать

Сахӑр песукӗ тӑруках хакланни ахаль ҫынсене кӑна мар, федерацин Монополипе кӗрешекен службине те канӑҫ памасть. Ҫӗршыври пысӑк лавккасене кӑна мар, cахӑр песукӗ туса кăларакан заводсене те тӗплӗн тӗрӗслеме тытăннӑ. Сахӑр хакӗ ҫине мӗн витӗм кӳнине тата вӑл лавккари сентресем ҫинче мӗншӗн пӗрмаях ҫухалнине тӗпчеҫҫӗ служба ӗҫченӗсем.

Финанс пĕлĕвĕ

Финанс пĕлĕвĕ тата предпринимательлĕх енĕпе олимпиада иртет. Унта мартăн 31-мĕшĕччен хутшăнма май пур. 1-9 классенче вĕренекенсем хушшинче йĕркелекен онлайн-олимпиада Учи.ру платформăра иртет. Сăмах май каласан, пĕлтĕр олимпиадăна 800 пин ытла шкул ачи хутшăннă, вĕсенчен 9 пине яхăнăшĕ – Чăваш Енрен.

Малтанхи йĕркепех ĕçлеме тытăннă

Республикăра коронавируспа чирлекенсен шучĕ чакса пырать. Çавна май ковид-госпитальсенчи вырăнсен хисепне те сахаллатаççĕ. Ҫак кунсенче Çĕнĕ Шупашкар хулин больници те малтанхи йĕркепе ĕçлеме пуçланă. Ковид-стационара пăрахăçланă, больницăри пÿлĕмсене тĕплĕн дезинфекци тунă. 

Регистрацилеме пултарĕç

"Шанхайра" пурăнакансем хӑйсен ҫурчӗсене саккунпа килӗшӳллӗн регистрацилеме пултарӗҫ. Сентябрĕн 1-мӗшӗнче "Дача амнистийӗ 2.0" пурнӑҫа кӗрет. Ҫавна май, 1998-мӗш ҫулхи май уйăхĕн 14-мӗшӗччен хӑйсем тӗллӗн ҫурт хӑпартнӑ ҫынсем пурлӑхне регистрацилеме пултарӗҫ. Ҫак ҫӗнӗлӗх Шупашкарти "Шанхай" районти ҫуртсене пурне те саккунпа килӗшӳллӗн регистрацилеме май парӗ.

Ĕç вырăнĕ

ЧР Ĕçлев министерстви ĕç рынокĕнчи лару-тăрăва тишкерсех тăрать. Мартăн 14-мĕшĕ тĕлне ĕçсĕр граждансен йышĕ 4689 çын пулнă. Ҫулталăк пуçланнăранпа вара республикăра 3013 çын ĕç тупнă.

20 процентне тавăрса парĕç

Раççейре «Туризм кэшбэкĕ» программăн черетлĕ тапхăрĕ  пуçланчĕ. Çынсем хамăр çĕршыври пансионатсемпе хăна çурчĕсенче тата  санаторисенче   йÿнĕрех хакпа канма пултараççĕ.  Путевка хакĕн 20 процент  яхăнне  5 кунтан  каялла тавăрса параççĕ. Анчах та ку хисеп 20 пин тенкĕрен ытла пулмасть.  Чи кирли – путевкăшăн «Мир» банк карттипе усă курса  тÿлемелле. Пирĕн республикăри 13 хăна çурчĕпе санатори те «Туризм кэшбэкĕ» программёпа ĕçлеме пуçланă.  Çак çăмăллăх май уйăхĕн 1-мĕшĕччен пулĕ.