Патшалăх деятелĕ, Граждан вăрçин участникĕ Алексей Васильевич Васильев (22.03.1897 - 25.11.1983) 125 çул каялла Тăрăнта çуралнă.

А. Васильев Чĕмпĕр чăваш шкулне пĕтернĕ. 1916 çулта патша çарĕнче тăнă. 1918 çулта Именкассинчи тата Елчĕк районĕнчи Шăмалакри пуçламăш шкулсенче ĕçленĕ. Граждан вăрçине хутшăннă. 1920-1923 çулсенче Пăва тата Патăрьел уесĕнчи халăха вĕрентес ĕç органĕсенче, 1927 çултан пуçласа ВКП(б)н Чăваш обкомĕн яваплă ĕçĕсенче, 1929-1932 çулсенче республикăри "Канаш" хаçатра, 1932-1937 çулсенче Чăваш АССРĕн çĕр ĕç наркомĕнче, 1937 çулхи август уйăхĕнчен Чăваш Енри ĕç тăвакан Тĕп комитечĕн председателĕн çумĕ пулса ĕçленĕ. Контрреволюциллĕ буржуаллă-национализмла организацие хутшăннă тесе ăна персе пăрахма йышăнаççĕ, каярахпа Атăлçи Çар округĕн çар трибуналĕн хупă сессийĕнче йышăнăва пăрахăçлаççĕ. 1950-1964 çулсенче Чăваш Ен ял хуçалăх министерствин тытăмĕнче хурт-хăмăр кантурĕн начальникĕ, çĕрйĕркелỹ пайĕн заведующийĕ, сад ĕçĕн тĕп агрономĕ пулса тăрăшнă.

Пирĕн ентешĕмĕр Хĕрлĕ Çăлтăр орденне тивĕçнĕ.

("Çулталăк кĕнекинчен").