Патăрьел район прокурорĕ водителĕн суя удостоверийĕпе усă курнă 23 çулхи çамрăк пирки пуçарнă уголовлă ĕç пирки айăплав постановленине çирĕп-летнĕ.

Тĕпчев çакна кăтартса панă. Айăпланакан 2021 çулта водительсем хатĕрлекен автошкулта вĕреннĕ, анчах вĕçне çитичченех мар. Декабрь уйăхĕнче вăл Мускавра автомашина туяннă май, ăна удостоверени кирлĕ пулнă. Çак тĕллевпе вăл Интернетра суя документ тăвакан çынна тупнă та палламанскере 35 пин тенкĕ укçа, хăйĕн сăн ỹкерчĕкне ярса панă. Кайран почтăпа удостоверенине илнĕ.

 Водитель суя документпа нумаях çỹреймен. Ăна 2022 çулхи январĕн 31-мĕшĕнче Патăрьелĕнче РФ ШĔМĕн районсем хушшинчи "Батыревский" уйрăмĕн ГИБДД пайĕн сотрудникĕсем чараççĕ, документ чăн пулни пирки иккĕленеççĕ. Тĕрĕсленĕ хыççăн база кăтартăвĕпе ун пек номерлĕ удостоверени пулманни палăрнă.

Водителе РФ УКăн 327 статйин 3 пайĕпе айăплама, çулталăклăха ирĕкрен хăтарма пултараççĕ. Тĕпчесе пĕлнĕ вăхăтра вăл хăйĕн айăпне йышăннă. Уголовлă ĕçпе çыхăннă айăплав постановленине Патăрьел район судне ярса панă.

 Суя удостоверени туса паракан пирки те полици сотрудникĕсем малалла ĕçлеççĕ.

А. АФАНАСЬЕВ, район прокурорĕ