Культура ĕçченĕсене чысланă

 Мартăн  25-мĕшĕнче культура ĕçченĕсен ячĕпе Чăваш патшалăх филармонийĕнче  савăнăçлă мероприяти йĕркеленĕ. Унта ЧР Пуçлăхĕ Олег Николаев, РФ Патшалăх Думин депутачĕ Алла Салаева, ЧР культура министрĕ Светлана Каликова, ЧР Патшалăх Канашĕн Председателĕ Леонид Черкесов хутшăннă. Олег Алексеевич культура ĕçченĕсен ĕçне пысăк хак панă. "Сирĕн хавхаланăвăр çăлкуç пек тапса тăтăр", - тенĕ. Чи хастаррисене патшалăх наградисемпе чысланă.

Силовые структуры

Патшалăх Канашĕ ятарлă çар операцине ырланă

 ЧР Патшалăх Канашĕн черетлĕ çиччĕмĕш сессийĕ кĕçнерникун пурте ура çине тăрса пĕр минут шăп тăнинчен пуçланнă. Пухăннисем Раççейĕн Украинăри ятарлă операцийĕнче вилнĕ салтакĕсемпе офицерĕсене асăннă. Виçĕ теçетке ытла пунктран тăракан кун йĕркинчи пĕрремĕш ыйту та Украинăри лару-тăрупах çыхăннă. Ку ыйтупа парламент спикерĕ Леонид Черкесов сăмах илнĕ, кӳршĕ çĕршывра национализм тарăн тымар янине кура Донбасс халăхĕ тĕлĕшпе сакăр çул геноцид политикине тытса пынине палăртнă. «Çĕршывăмăр пуласлăхĕ пирĕн алăра, — тенĕ Леонид Ильич, — пирĕн Çĕр çинчи тăнăçлăха хӳтĕлес тĕллевпе пĕрле пулмалла». Вăл Патшалăх Канашĕ РФ Президенчĕн Владимир Путинăн ятарлă çар операцийĕ ирттерессипе çыхăннă йышăнăвне ырлани çинчен пĕлтерме чĕнсе каланă — парламент унпа килĕшсе пĕр саслă пулса сасăланă. Сесси кун йĕркинчи тĕп ыйту — республикăн 2022 çулхи, планпа пăхнă 2023 тата 2024 çулсенчи бюджетне улшăнусем кĕртесси çинчен калакан саккун проекчĕ пулнă.

Инвалидсене ĕçпе тивĕçтерессине пăхса тухнă

 ЧР Министрсен Кабинечĕн ларăвĕнче куçми пурлăха регистрацилесси çинчен калакан саккуна пурнăçламалли уйрăмлăхсене тишкернĕ. Малашне нумай функциллĕ центрсем пурлăха кадастр енĕпе шута илессипе çыхăннă пулăшу ĕçĕсемпе вырăна тухса та тивĕçтерĕç. Паллах, ку пулăшу тӳлевлĕ пулĕ. Тăван çĕршывăн Аслă вăрçин ветеранĕсене, инвалидсене çак тӳлеврен хăтарнă. Çĕнĕлĕхе ĕçе кĕртме бюджетран хушма укçа уйăрмалла, анчах, экономика аталанăвĕн министрĕ Дмитрий Краснов палăртнă тăрăх, граждансем пулăшушăн тӳлев хывасси ĕçлесе кайсан бюджетăн çак тăкакĕпе çыхăннă статьяна çĕнĕрен тишкерме май пулĕ. Ĕçлев министрĕ Алена Елизарова предприятисенче инвалидсене ĕçе йышăнмалли квотăсен ыйтăвĕпе сăмах илнĕ. Инвалидсене обязательнăй майпа ĕç вырăнĕсемпе тивĕçтерессине саккунпа çирĕплетнĕ. Вăл 101-500 çын ĕçлекен организацисенче инвалидсем валли 1 ĕç вырăнĕ, 501 тата ытларах çын вăй хураканнисенче 2 ĕç вырăнĕ уйăрмалли квотăсене çирĕплетме сĕннĕ — Правительство çак сĕнӳпе килĕшнĕ.

 Шкул ачисем ҫӗнӗ технологисене алла илеҫҫӗ

Канаш хулинчи цифра вĕрентĕвĕн центрĕнче программировани енĕпе республика конкурсне пĕтĕмлетнĕ. Шкул ачисем ятарлă программăпа усă курса мультфильмсемпе викторинăсем хатĕрленĕ. Ĕçсен тĕп теми паллă ентешсемпе çыхăннă. Конкурсантсен ĕçĕсене цифра министрĕ Кристина Майнина, перекет банкĕн Чăваш Енри управляющийĕ Анастасия Трутнева хакланă. Кристина Майнина палăртнă тăрăх, 8-12 çулсенчи ачасем çĕнĕ технологисене алла илнĕ, ятарлă программăсемпе ĕçлеме пĕлеççĕ, çав вăхăтрах республикăри паллă çынсемпе, наци культурипе паллашаççĕ.