ЮЛАШКИ çулсенче Патăрьелĕнчи халăх театрĕ çынсене хăйсен пултарулăхĕпе çеç савăнтармасть, тĕрлĕрен конкурса хутшăнса хисеплĕ те сумлă ятсене те çĕнсе илет. Иртнĕ çул вĕсем тĕрлĕ халăх хушшинче йĕркеленĕ "На волне -2021" конкурс дипломанчĕ пулнă. Маларах сцена ăстисене "Национальное достояние-2020" конкурсра çĕнтернипе саламланăччĕ.

Районти культура çурчĕ çумĕнче йĕркеленнĕ театр ушкăнĕ çак кунсенче Пĕтĕм Раççейри "Пушкин картти" программăна хутшăнса тата Театр кунĕ ячĕпе Александр Кăлканăн "Анисса" пьесипе куракансене савăнтарнă. Режиссерĕ - Чăваш Республикин культурăн тава тивĕçлĕ работникĕ Луиза Леонтьева, лартаканĕ - Лариса Федорова. Спектакльте юратакан икĕ чĕре пурнăçри йывăрлăхсене çĕнтерсе малалла ăнтăлни, артистсем сăнарсене ăста калăплани пурне те тыткăнланă.