Çĕнĕ заказсем шыраççĕ

 Санкцисем Шупашкарти электроаппарат завочĕн тата "Элара" пĕрлешĕвĕн ĕç-хĕлне витĕм кỹме пултараççĕ. Çапах та заказсен шучĕ сыхланса юласса шанаççĕ. Чикĕ леш енчи компанисем пирĕн çĕршыва продукципе тивĕçтерме пăрахнăран Раççейри компанисем хамăрăннисене ытларах туянаççĕ. Çавăнпа та çакă лару-тăрăва шайлаштарма пулăшмалла, пандеми те йывăрлăхсене парăнтарма вĕрентрĕ. Экономикăшăн çăмăл мар тапхăрта çĕнĕ партнерсем шырама хистерĕ. Халĕ те предприятисем санкцисене пăхмасăрах производствăна аталантарма, çĕнĕ заказсем тупма ăнтăлаççĕ.

Парад та пулĕ, акцисем те иртĕç

Çĕнтерỹ пулнăранпа кăçал 77 çул çитет. Паянхи кун республикăра Тăван çĕршывăн Аслă вăрçин нушине тỹснĕ 6,5 пин çын пурăнать. Вĕсенчен 165-шĕ - вăрçа хутшăннă çынсемпе инвалидсем. Кăçал культура учрежденийĕсенче 2 пинрен кая мар мероприяти ирттересшĕн. 2022 çул Чăваш Енре Мухтавлă ентешсен çулталăкĕ пулнă май пĕр пайне чăваш ятне вăрçă хирĕнче çĕкленĕ Совет Союзĕн Геройĕсене халалĕç. Республика тỹремĕнче Çĕнтерỹ парачĕ иртĕ. Çавăн пекех "Вилĕмсĕр полк", "Çĕр фрончĕн паттăрĕсем" акцисене ирттерме хатĕрленеççĕ. Чăваш Ен Пĕтĕм Раççейри "Çĕнтерỹ вальсĕ", "Астăвăм вахти", "Çĕнтерĕве ỹкеретпĕр", "Тавах Çĕнтерỹшĕн" акцисене те хутшăнĕ.

Яваплăх ỹсет

Апрелĕн 11-мĕшĕнче пушар хăрушсăрлăхне пăхăнмалли çирĕп тапхăр пуçланать. Çуркунне çитнĕ май типĕ курăк е çỹп-çап çунтарнăран тата çутçанталăкра каннă вăхăтра кăвайт чĕртнĕрен вут-çулăм тухнă синкерлĕ пулăмсен шучĕ ỹсет. Çынсене яваллăрах тăвас тесе çакăншăн айăплисене явап тыттармалли йĕркене те çирĕплетеççĕ, штрафсен виçине те ỹстереççĕ.

Ярмăрккăсенче йỹнĕрех

Апрелĕн 2-мĕшĕнчен республикăри 5 хулара ял хуçалăх таварĕсем сутас тĕлĕшпе ĕçлекен ярмăрккăсем ĕçлеме тытăннă. Шупашкарта 3 лапам йĕркеленĕ: "Николаевский", "Шупашкар" суту-илỹ комплексĕсенче, "Северная" суту-илỹ комплексĕн умĕнчи лапамра. Ял хуçалăх таварĕсене туса илекенсене тỹлевсĕр вырăнсемпе тивĕçтернĕ. Апат-çимĕç хакĕсем лавккаринчен йỹнĕрех.

Полигонсем хута кайĕç

2023 çулта Патăрьелĕнче, Вăрнарта, Канашра тата Муркашра çỹп-çап уйăракан полигонсем хута кайĕç. Вĕсем республикăри çỹп-çап полигонĕсен шутне чакарма пулăшĕç. Унсăр пуçне республикăра ăпăр-тапăра уйăрса пуçтарма палăртаççĕ.

Чăваш юманĕшĕн сасăлар

Майăн 1-мĕшĕнче "Раççейри çулталăк йывăççи" конкурс каллех старт илет. Çавна май кашниех чăваш юманĕшĕн сасăлама пултарать. Сасăлав июнĕн 1-мĕшĕччен www.rosdrevo.ru сайтра иртет. Хальхи вăхăтра конкурса хутшăнакан йывăçсен списокне хатĕрлеççĕ. Сăмах май, 2020 çулта Муркаш районĕнчи Ильинка çывăхĕнчи 371 çулти чăваш юманĕ Раççейри тĕп йывăç ятне илтессишĕн кĕрешнĕ. Вăл ун чухне иккĕмĕш вырăн йышăннă, Дагестанри йывăç чи нумай сасă пухнă.