АПРЕЛĔН 7-мĕшĕнче православи тĕн йăли-йĕркине пăхăнса пурăнакансем Пăлхавăшни праçникне е Турă Амăшне çие юлни пирки ырă хыпар каланине паллă турĕç. Çак кун кайăк та йăва çавăрмасть, хĕрсем çивĕт те тумаççĕ тенĕ. Вăл йĕпе пулсан-кăмпа пуласса, тỹпе таса, хĕвел савăнтарсан - çу аслатиллĕ килет имĕш. Çумăр çусан - ыраш ăнса пулĕтенĕ сăнакансем. Сăмах май каласан, çак кун уяр та хĕвеллĕ пулчĕ. Çитес вырсарникун, апрелĕн 17-мĕшĕнче - Кăчăкă праçникĕ, Иисус Христоса чиркĕве илсе кĕни. Ун чухне кĕлĕ çурчĕсенче кăчăкă турачĕсене сăваплаççĕ, вĕсене тепĕр çулччен килти Турă кĕтесĕнче упраççĕ.
