2022 çула Чăваш Енре Мухтавлă ентешсен çулталăкĕ тесе йышăннă. Çавна май Патăрьелĕнчи пĕрремĕш вăтам шкулти 5-7 класра вĕренекенсемпе "Паллă ентешсемпе мухтанатпăр!" класс тулашĕнчи мероприяти иртрĕ. Вĕсем чăваш çĕрĕн мухтавлă çыннисемпе паллашрĕç. Палăрнисем хушшинче Патăрьел çĕрĕнче çуралса ỹснĕ ỹнерçĕсем, спортсменсем, актерсем, çыравçăсем, республика малашлăхĕшĕн тăрăшакансем пулчĕç.

Мероприятинче "Пирĕн ентешсем - пирĕн мăнаçлăх" викторина та питĕ интереслĕ иртрĕ. Ыйтусем çине хуравланă май вĕренекенсемшĕн пĕлмелли, тĕлĕнмелли нумай пулчĕ.

Ачасем класс тулашĕнчи мероприятинче ентешсен сăввисене пăхмасăр вуласа пачĕç. Залра итлесе ларакансене уйрăмах Данила Левашкин, Анастасия Медведева (7 класс), Камилла Хитрова, Ксения Осипова, Анастасия Прискина, Алия Сафиуллова, Мила Сундулова (5 класс) вуланă хайлавсем килĕшрĕç. Вĕренекенсем çавăн пекех тăван чĕлхе çинчен калакан ваттисен сăмахĕсемпе каларăшсене, тупмалли юмахсене аса илсе хăйсен тавçăрулăхне тĕрĕслерĕç. "Паллă ентешсемпе мухтанатпăр!" мероприяти тухăçлă иртрĕ.

 В. ФЕДОРОВА, Л. СОРОКИНА, О. АЛЕКСАНДРОВА, чăваш чĕлхипе литературине вĕрентекенсем.