Апрель уйăхĕнче улма-çырла йывăç-тĕмне хăрăк, хуçăлнă е ытлашши туратран иртмелле. Çĕр типеймен пулсан çакна тума кăштах тăхтамалла. Унсăрăн тăпра таптанать, каярахпа типсе хытать.

 Ỹсен-тăрана чир-чĕртен, сă- тăрçăсенчен хỹтĕлемелле. Ку енĕпе бордос шĕвекĕ, "хорус" препарат аван пулăшать. Папка тулса çурăлман чухне йывăç-тĕме азот хутăшлĕ удобренипе апатлантармалла: мочевина (10 л. шыва 700 г), аммиак селитри (10 л. 1 кг) е аммони сульфачĕ (10 л. 1,5 кг). Асăннă препаратсем сăтăрçăсен çăмартисене, чир пуçаракансене пĕтереççĕ. Азот хушнăран ỹсен-тăрана апатлантарма та аван.

Апрельте çанталăк ăшăтсан ỹсен-тăран çинчи витнĕ япаласене (йывăç кĕрпи, çĕрĕк тăпри, çулçă) илмелле. Унсăрăн вăл сывлăш çитменнипе çĕрĕшет. Анчах çак ĕçе майĕпен пурнăçламалла: юр е пăр ирĕлнĕ май сий-сий илмелле. Тăруках пĕтĕмпе уçма юрамасть, çĕрле шăнтсан ỹсен-тăран сиенленет.

Çĕр çырли йăранне йĕркене кĕртмелле. Апрельте типĕ çулçă пуçтармалла, рет хушшисене комплекслă удобрени хывмалла (1 тăваткал метра 100 г). Çырла маларах пиçме йăрана пленкăпа хупласа парник пек тусан та аван. Апрель варринче йывăç сыпма юрать. Хунав сыпмалли мел нумай, кирек хăшĕпе те усă курма пулать.