"Эпĕ - хĕрарăм" конкурс пĕрремĕш хут пĕлтĕр иртнĕччĕ. Унта тĕрлĕ сферăри 351 харсăр хутшăннăччĕ. Вĕсем хăйсем çинчен презентаци хатĕрленĕччĕ. Конкурса Чăваш Енри Хĕрарăмсен канашĕпе "Пĕрле" аталану фончĕ йĕркеленĕччĕ. Пĕтĕмлетĕвне Республика кунĕнче тунăччĕ.

Кăçал та йĕркелеççĕ ăна. Апрель уйăхĕнче старт параççĕ. Тĕллевĕ иртнĕ çулхиех юлать. Вăл обществăра хĕрарăм пĕлтерĕшне ỹстерессипе тата вĕсем республика малашлăхне хăйсен тỹпине хывассипе çыхăннă.

Конкурс 6 номинаципе иртмелле: "Экономикăна эпир тăватпăр", "Саккун хỹтлĕхĕнче", "Пĕлỹ патне чăрмавсемсĕр", "Сывлăхшăн тăрăшса", "Общество интересĕсемшĕн", "Хамăрăн, Чăвашсен".

Заявкăсене тата видеопрезентацисене апрелĕн 25-мĕшĕнчен пуçласа майăн 25-мĕшĕччен йышăнаççĕ. 2 минутлăх презентацире хăвпа тĕплĕн паллаштарма тăрăшмалла. Пурнăç, ĕç-хĕл, професси ăсталăхĕ, обществăлла ĕç те çуталтăр унта. Видеороликсене Чăваш Республикин порталне сасăламашкăн вырнаçтараççĕ. Сасăлав июнĕн 1-15-мĕшĕсенче пырать. Пĕтĕмлетĕве июнĕн 16-18-мĕшĕсенче тăвĕç.

 Кашни номинацирех Гран-при пулмалла. Онлайн сасăлавĕпе 1-3 вырăн йышăннисене палăртĕç. Чыславĕ вара июнĕн 24-мĕшĕнче, Республика кунне уявланă чухне пулать.

Пĕлтĕр республика шайĕнче йĕркеленĕ конкурса районта пурăнакансем чылайăн хутшăннăччĕ. Вĕсенчен пĕри - конкурс çĕнтерỹçи, районти тĕп больницăн врачĕ Фирия Хафизова:

- Конкурса хутшăнни мана чылай хавхалану кỹчĕ. Пĕрлех ковид уйрăмĕнче ĕçлени хисепĕме ỹстерчĕ. Татăклă йышăнусем тума пултартăм. Коллектив шанăçĕ, пациентсен тавĕ, мăшăрăн хисепĕ, ачасен юратăвĕ, аслисен ăшши пултарулăхăма вырăна хурса хакланиех пулчĕ. Малашлăхра тата тăрăшарах ĕçлес кăмăл-туйăма çĕклерĕ.

А. КАПИТОНОВА