Паян вырăнти власть тытăмĕнче халăхпа çыхăну тытса ĕçлеме пулăшакан çул-йĕр сахал мар: районти депутатсен Пухăвĕн, вырăнти хăй тытăмлăх органĕн депутачĕсем, старостăсем, Общество канашĕн, обществăлла организацисен хастарĕсем тата ытти те.

Хальхи вăхăтра муниципалитет аталанăвĕшĕн, халăх пурнăçне хăтлăлатассишĕн тăрăшакансенчен ял тăрăхĕн пуçлăхĕсене пулăшакан специалистсем те пысăк ĕç туса пынине палăртасшăн. Вĕсем районти 19 ял тăрăхĕнче те пур. Чылайăшĕ вĕсенчен хăй тытăмлăх органĕнче пуян опытлă. Çĕньял ял тăрăхĕнчи Антонина Николаевна Тарасова тĕп специалист-эксперт та çак ĕçре çĕнĕ çын мар. Яваплă тивĕçе "кỹлĕнни" вунă çул ытла ĕнтĕ. Маларах педагог тата юрист профессийĕсене алла илнĕ специалист Патăрьелĕнчи шкул-интернатра 20 çул ĕçленĕ.

Вырăнти хăй тытăмлăх органĕнче халăхпа пĕр чĕлхе тупса ĕçлеме, вĕсен ыйтăвĕсене профессионал шайĕнче татса пама, çав вăхăтрах çĕнĕрен вăя кĕрекен саккунсене алла илме çăмăл мар. Ку тĕлĕшпе Антонина Николаевнăн ăс-хакăл пуянлăхĕ те, тавра курăмĕ те, культурăлăхĕ те çителĕклĕ. Çăмăл мар ĕçе юратса тата тĕплĕн туса пынăранах халăхра та хисеплĕ, ырă ятлă. Общество пурнăçĕнче те хастар. Ахальтен мар ĕнтĕ ăна "Районти чи лайăх муниципаллă служащийĕ" хисеплĕ ятпа чысланă. Ун хыççăн вăл республикăри муниципаллă служащисен конкурсне хутшăнса та призерсен хушшине лекнĕ.

_ Пирĕн тĕп тĕллев - ял тăрăхне хăйсен пăшăрханăвĕпе килекен çыннăн ыйтăвне татса парасси, тивĕçтересси, халăхăн интересĕсене хỹтĕлесси, вĕсен пурнăçне хăтлăлатасси. Ку тĕлĕшпе хамăрăн ял тăрăхĕнче çирĕп йĕрке пулни те ĕçе чылай çăмăллатать. Ял тăрăхĕн пуçлăхĕ Мария Мадюкова тăрăшнипе юлашки çулсенче ялсен сăн-сăпачĕ чылай çĕнелчĕ, масарсем тирпейленчĕç, пуçару бюджечĕпе часовньăсем хута кайрĕç, çулсем, кĕперсем çĕнелчĕç, культура çурчĕсем капăрланчĕç тата ытти те. Влаçпа халăх пĕр чĕлхе тупса ĕçлени малашне те пирĕн ял тăрăхне аталанма май парĕ,_ терĕ А. Тарасова тĕп специалист-эксперт хăйсен ĕçне кĕскен хак парса.

А. ЕГОРОВА