Конкурс виççĕмĕш хут иртет

 Июлĕн 1-мĕшĕнчен пуçласа lider.cap.ru сайтра "Ертсе пыракансен команди" конкурса хутшăнас текенсене регистрацилеме пуçланă. Электрон заявкăсене сентябрĕн 13-мĕшĕччен йышăнаççĕ. Конкурс республикăра виççĕмĕш хут иртет. Унта 55 çула çитмен, аслă пĕлỹллĕ, ертỹçĕ должноçĕнче виçĕ çултан кая мар ĕçлекен çынсем хутшăнма пултараççĕ.

524 млн тенкĕ грант уйăрнă

Чăваш Республикине социаллă пĕлтерĕшлĕ проектсене пурнăçлама 524 млн тенкĕ грант уйăрса панă. Республикăн финанс министрĕ Михаил Ноздряков пĕлтернĕ тăрăх, укçа-тенкĕне ял тата çурт-йĕр хуçалăхне пулăшу кỹме, сывлăх сыхлавне модернизацилеме тăкаклĕç. Çапла, 300 млн тенкĕ ял хуçалăх техникине туяннă пайне субсидипе тавăрма, 25 млн тенкĕ Çĕрпỹ, Вăрмар, Вăрнар тата Елчĕк районĕсенче фельдшерпа акушер пункчĕсене хăпартма уйăраççĕ. 199,3 млн тенкĕ, çав шутра 101,9 млн тенкĕ - çичĕ тата ытларах ачаллă çемьесене çуртпа тивĕçтерме, 97,4 млн тенкĕ - чакарнă процент ставкипе çăмăллăхлă ипотека кредитне субсидилеме каять.

Ентешсем пухăнĕç

Октябрĕн 28-мĕшĕнче Чăваш Енре Пĕтĕм тĕнчери "Ентешсен çăлтăрлăхĕ" фестиваль виççĕмĕш хут иртет. Çак кунсенчех Чăваш Республикин Пуçлăхĕ Олег Николаев Ентешсен форумне йĕркелеме тата "Сăр чикки" опера премьерине кăтартма сĕннĕ. Экономика Раз-е туризма Турист кодне илĕç Шупашкар тата Улатăр хулисем турист кодне илме хатĕрленеççĕ. Ростуризм 40 заявка суйласа илме, 7 миллиард тенкĕ (кашни проекта 175 миллион тенкĕ) уйăрма палăртнă. Чăваш Енрен конкурса Шупашкар тата Улатăр хулисем хутшăнаççĕ. Регион шайĕнче çĕнтерỹçĕсене палăртнă чухне муниципалитетра истори пĕлтерĕшлĕ вырăнсен, палăксен шутне пăхнă.

Хăй тĕллĕн ĕçлекенсен йышĕ ỹсет

Чăваш Енре хăй тĕллĕн ĕçлекенсем 4,7 миллиард тенкĕ ĕçлесе илнĕ. РФ Налук службин Чăваш Енри управленийĕ пĕлтернĕ тăрăх,професси тупăшĕшĕн тỹлекен 28 пин çынна регистрациленĕ. Куллен хăй тĕллĕн ĕçлекенсен шучĕ 40-45 çын ỹсет.

Ĕçтешлĕх килĕшĕвне çирĕплетнĕ

Чăваш Ен тата Чĕмпĕр облаçĕ "ИННОПРОМ - 2022" форумра ĕçтешлĕх килĕшĕвне çирĕплетнĕ. Çавна май Чĕмпĕрти промышленность предприятийĕсем Чăваш Енри Трактор заводне хăйсен продукцийĕпе тивĕçтерĕç.

Вăтам пурнăç тăршшĕ кĕскелнĕ

 Республикăра юлашки çулта çынсен вăтам пурнăç тăршшĕ кĕскелнĕ. Ку "2021 çулта Чăваш Республикинчи халăх сывлăхĕ пирки" докладран паллă. Пĕлтĕр арçынсем вăтамран 64 çул пурăннă, хĕрарăмсем - 74 çул. Пĕлтĕр вилнисен шучĕ, 2020 çулхипе танлаштарсан, 1600 çын ытларах пулнă.