Финала тухнисене чысланă

Июлĕн 11-мĕшĕнче «Çамрăк лидерсен команди» республика конкурсĕн финалне тухнисемпе çĕнтерӳçисене чысланă. Чăваш Ен Пуçлăхĕ Олег Николаев пуçарнипе регионти Вĕрентӳпе çамрăксен политикин министерстви йĕркелекенскер виççĕмĕш хут иртнĕ. Çамрăксем хăйсен ертӳçĕ пултарулăхне, тарăн ăс-тăнне, пĕлтерĕшлĕ йышăнусем тума, тĕллевлĕн ĕç пуçарса тухăçлăхне палăртма пĕлнине тупăшу тĕрлĕ тапхăрĕнче кăтартнă. Финала 25 çамрăк тухнă. Çĕнтерӳçĕсем Чăваш Ен Пуçлăхĕ çумĕнчи çамрăксен кадр резервне кĕрĕç. Вĕсен çумне наставниксене çирĕплетĕç. Çавăн пекех вĕсене Раççей халăх хуçалăхĕн тата патшалăх службин академийĕн Чăваш Енри филиалĕ вĕренме йышăнĕ.

Комплекслă программăна çирĕплетнĕ

Министрсен Кабинечĕ 2022-2026 çулсенче республикăра федераци бюджечĕн укçине явăçтарса объектсем тумалли комплекслă программăна çирĕплетнĕ. Унта 11 миллиарда яхăн тенкĕлĕх 306 объекта кĕртнĕ. Правительствăн юнкун ЧР Пуçлăхĕ Олег Николаев ертсе пынипе иртнĕ ларăвĕнче экономика аталанăвĕн министрĕ Дмитрий Краснов программăпа паллаштарнă май унта кĕртнĕ объектсен списокне инвестици политики енĕпе ĕçлекен канаш ларăвĕнче тишкерсе ырланине пĕлтернĕ. Малтанхи тапхăрта, 2022-2024 çулсенче, тумалли, реконстукцилемелли объектсене уйрăммăн палăртнă. Вĕсем — тĕрлĕ сферăра: чи нумаййи сывлăх сыхлавĕнче — 92 объект. Çавăн пекех асăннă тапхăрта физкультурăпа спортăн 29, пурăнмалли çурт-йĕрĕн 17, вĕрентĕвĕн 11, экологин 15, туризмăн 10 объекчĕн строительствине е реконструкцине пурнăçламалла. Комплекслă программăна пурнăçлама кăçал — 5,4 миллиард, çитес çул — 17,5 миллиард, 2024 çулта 21,3 миллиард тенкĕ уйăрĕç.

«Атăл» ятарлă çар операцине хутшăнĕ

Асăннă батальон — Чăваш Енре йĕркелекен подразделени. «Тăван çĕршывăн Аслă вăрçи вăхăтĕнче унашкаллисем стрелоксен 139-мĕш тата 324-мĕш дивизийĕсем пулнă — вĕсем çĕршыва хӳтĕлессипе çыхăннă тĕллевсене пурнăçланă, халĕ вара резервистсенчен çакăн пек çыхăну батальонĕ йĕркеленет. Хăйсен ирĕкĕпе Раççей çарĕн ретне тăракансен, çав шутра Украинăри ятарлă операцие хутшăнаканскерсен, çемйисене пулăшас тĕллевпе пĕр хутчен тӳлев пама йышăнтăмăр», — тенĕ тунтикунхи канашлура Чăваш Ен Пуçлăхĕ Олег Николаев. Тӱлев 200 пин тенкĕпе танлашать. Сăмах май, ятарлă подразделенисем хатĕрлес ĕçе нумай регионта пуçарнă.

Раççей Геройĕн ятне панă

Дмитрий Владимирович Семенов  Шупашкар районĕнчи Тренкасси ялĕнче çуралса ӳснĕ. Вăл майор, штаб командирĕ – спецназăн 16-мĕш бригадин отрячĕн командирĕ пулнă. Украинăра çар заданине пурнăçланă чухне паттăррăн пуç хунă. Пысăк наградăна унăн амăшĕ — Алина Георгиевна — патне Тĕп çар округĕн командующийĕн тивĕçĕсене пурнăçлакан Рустам Миннекаев генерал-майор илсе çитернĕ.

Республикăпа паллашĕç

Шкул ачисен хушшинче туризма аталантарма çĕршывра çĕнĕ программа хута янă. Унта хутшăнакан 18 регион шутне Чăваш Ен те кĕрет. Çак программăна пурнăçлама республика тата федераци бюджетĕнчен 22 миллион ытла тенкĕ уйăрĕç. Турсене 5-9-мĕш классенче вĕренекенсем хутшăнаяççĕ. Вĕсем республикăри паллă вырăнсене курса çӳрĕç, «виçĕ çăлтăрлă» хăна çурчĕсенче пурăнĕç. Çапла майпа ачасем тăван ен историне лайăхрах вĕренĕç.