ÇУ КУНĔ хĕвеллĕ те ăшă, çав вăхăтрах çумăрлă çанталăкпа та илемлĕ. Çапах та тепĕр чухне кăнтăрти евĕр шăрăха хăнăхманскерсене çут çанталăкăн ырă пулăмне чăтма та йывăр. Çынсем сулхăнта ларма çеç мар, шыв хĕрринелле туртăнма та тăрăшаççĕ. Çавăн пек чухне шăпах шыври хăрушсăрлăха пăхăнмалла та. Акă, иртнĕ канмалли кунсенче çеç республикăра каллех синкерлĕхпе çыхăннă тĕслĕхсем пулнă, виçĕ çын (пурте арçынсем) путса вилнĕ. Çу кунĕсен иккĕмĕш уйăхĕн çуррине çеç çитнĕ пулин те çак сăлтавпа 21 çыннăн пурнăçĕ татăлнă. Инкекрен Турă сиртĕр те, ку таранччен пирĕн районта усал хыпар пулман. Анчах та çакă шыв хĕрринче асăрханулăха хавшатмалли сăлтав пулмалла мар.