Çуллахи вăхăтра инфекци, ытти чир-чĕр ерес хăрушлăх пысăк. Ачасем хĕвел ăшшинче чупаççĕ, хăйăр, курăк çинче выляççĕ. Асăрхаттармасан аллисене те çума манаççĕ.

 Ку хутĕнче ачасене сăвăс тапăнас хăрушлăх пирки çырса кăтартасшăн. Вĕсем çуркуннехи-çуллахи çанталăкра курăк айĕнче, çỹллех мар тĕмсем, тепĕр чухне йывăçсем çинче тĕл пулаççĕ. Çын, ача-пăча çывăхра чухне тумтир çине куçаççĕ. Çỹлелле хăпарса ỹт çине вырнаçаççĕ.

Енчен те эсир ачасемпе уçăлма тухрăр пулсан утма хăнăхаканскерсене алăра тытса çỹрĕр, е коляскăна вырнаçтарăр. Кун пек чухне хĕрĕр е ывăлăр курăк çине лармасть.

Аслăрах çулхисене те сăвăс сиен кỹме пултарни çинчен тĕплĕн ăнлантарса памалла. Вăл ан çыпăçтăр тесе ятарлă хатĕрсемпе тумтире сирпĕтмелле. Ачасем кирек хăш хуртпа та интересленме пултараççĕ. Хăшĕсем вĕсене алăпа тытни те пулать.

Республикăра кăçал 400 çынна сăвăс ерни тĕл пулнă. Иртнĕ эрнере 45 çынра ăна тупса палăртнă.

 Асăрханнине нимĕн те çитмест. Ỹт çине çыпăçнă сăвăса кăларас тесен медицина ĕçченĕсенчен пулăшу ыйтмалла.

 Н. ЗАЙЦЕВА, Патăрьелĕнчи врач амбулаторийĕнчи медицина сестри