КĂÇАЛ Улатăр тата Пăрачкав епископĕ Феодор Юхмапа Пăла тăрăхне пĕрре мар килсе кайрĕ. Вăл Нăрваш Шăхалĕнчи, Первомайскинчи, Державная Турă Амăшĕн иконĕ ячĕллĕ Патăрьелĕнчи чиркỹсенче Турра ĕненекенсемпе тĕл пулчĕ, вĕсене пил пачĕ, литурги ирттерчĕ, чиркĕве пулăшакансене Тав хучĕсемпе чысларĕ тата ытти те. Июлĕн 31-мĕшĕнче те вăл пирĕн пата çула тухать, ирхине 7 сехет те 30 минутра Владыка çветтуй Троица ячĕллĕ Туçари чиркỹре литурги ирттерме, тĕн йăли-йĕркине тытса пыракансемпе тĕл пулма хатĕрленет.

- Йăла-йĕркепе ĕненỹ - кирек мĕнле наци халăхĕн те иксĕлми пуянлăхĕ. Паян хамăрăн ĕненĕве çирĕп тытса пыни питĕ пĕлтерĕшлĕ. Владыка Турра ĕненекенсем хушшинче тăтăшах пулни, пачăшкăсемпе тĕл пулни, кĕлĕсем ирттерни, çынсемпе калаçни чиркĕве çỹрекенсене хавхалантарать. Хальхинче вăл пирĕн районта икĕ кун пулма, Алманчăри преподобный Серафим Соровский ячĕллĕ скитра иртнĕ çул уçнă чиркĕве çитме те шутлать, ытти тĕллевсем те пур,- çапла пĕлтерчĕ "Авангард" хаçат редакцине Улатăрпа Пăрачкав епархийĕн III округ благочиннăйĕ, çветтуй Троица ячĕллĕ Туçа чиркĕвĕн настоятелĕ Николай Марков протоиерей.