РАЙОНТА тухса тăракан "Авангард" хаçатăн тусĕсем çĕршывăн кирек хăш кĕтесĕнче пурăнсан та "чун апатĕнчен" сивĕнмеççĕ, ăна почта çыхăнăвĕ урлă çырăнса илекенсем те пур. Кун пек хастар ентешсенчен пĕри Шупашкарта пурăнакан Нурсовсен çемйи. Темиçе çул каялла вĕсем Патăрьелĕнчен тĕп хулана пурăнма куçрĕç, ватлăхра тăван тĕпренчĕкĕсемпе юнашар пулма шутларĕç. Çапах та тивĕçлĕ канăва тухнă мăшăр райхаçата çырăнма пăрахман. "Эпир мĕн ачаран тăван хаçатăмăра вуласа, юратса ỹснĕ. Мăшăрăм, Николай Николаевич, районти ветерансен "Темп" футбол командине йĕркелесе ертсе пынăран ăна ытларах спорт теми, районта тăвакан çĕнĕ çитĕнỹсем кăсăклантараççĕ. Вăл халĕ те спортпа туслă. Эпĕ вара пĕрремĕш страницăран пуçласа юлашкине çитиччен кашни хыпарпа тĕплĕн паллашатăп. "Авангард" пирĕн çемьен чун апачĕ шутланать",-тет кăмăлтан район хаçачĕн çывăх тусĕ Лариса Семеновна.