Çĕнĕ Ахпỹртри пĕтĕмĕшле пĕлỹ паракан тĕп шкулти 4 тата 8 классене çỹрекенсем хальхинче урока ашшĕсене чĕнчĕç. Мĕншĕн тесен çывăх çыннисен пурнăçри пĕлтерĕшĕ питех те пысăк. Вĕсем çемьене тытса тăраççĕ, ачасене воспитани параççĕ тата ытти те. Виктор Даниловпа Николай Шикин çитĕнекен ăрушăн атте тивĕçĕ пысăк пĕлтерĕшлĕ пулнине каларĕç. Вĕсен пуриншĕн те кăтартуллă, çемье тĕрекĕ пулмалла. Ашшĕ ачисен пулăшаканĕ, ăс вĕрентекенĕ те. Ун çине пăхса ырă енсене нумай илме май пултăр. Çакăн чухне çеç ачасем телейлĕ ỹсеççĕ. Çемьене савăнăç çитет.

А. ИВАНОВА

Шухăш

Владимир ВЕРЛИКОВ, Чăваш Республикин тава тивĕçлĕ культура ĕçченĕ, Первомайски ялĕнчи культура çурчĕн директорĕ:

- Аттен кăтартуллă пулмалла. Мăшăрпа эпир икĕ ывăл çуратса ỹстертĕмĕр. Вĕсем халĕ çар тивĕçне пурнăçлаççĕ. Ачасене патриотла воспитани пама, вĕсемшĕн яланах кăтартуллă атте пулма тăрăшрăм. Шкулта иртекен мероприятисенчен, пухусенчен юлман. Çемьепе конкурссене сахал мар хутшăннă. Районта "Çулталăк ашшĕ-2017" конкурс çĕнтерỹçи пулнăччĕ. Икĕхутчен республикăра та палăрнăччĕ.

Валерий ПЛАТОНОВ, Чăваш Республикин тава тивĕçлĕ физкультура ĕçченĕ, Патăрьелĕнчи ачасемпе çамрăксен спорт шкулĕн тренер-преподавателĕ:

- 3 ача ашшĕ пулнăран килте те, ĕçре те куллен çитĕнекен ăру хушшинче эпĕ. Паллах, хамăрăн çитĕннĕ, 9 мăнук ỹсет. Ĕçре вара 100е яхăн ачана спорта юратма, унпа пиçĕхсе ỹсме хăнăхтаратпăр. Шывра ишес, чупас, тăршшĕне, çỹллĕшне сикес... ăсталăхĕ те пултăр вĕсен. Сăнавлă ушкăн та пур. Вĕсен малашлăхне хăйсен тăрăшулăхне кура палăртатпăр.

Ачасем пурнăçра тĕрĕс çул суйласа илччĕр тесе кашнийĕшĕн тăрăшмалла. Спортпа туслă çын сывлăхлă çитĕнет. Вĕсем сывă пурнăç йĕркине кăмăллакан юлташсем тупаççĕ. Ачисемшĕн тĕслĕхлĕ ашшĕсем пулни те савăнтарать. Акă, Айрат Салихов, Ильшат Кучатов, Радик Заббаров ывăл-хĕрне кирек ăçта иртекен ăмăртăва илсе кайма та хирĕçлемеççĕ. Оля Краснова, Софья Яковлева, Алсу Кучатова, Андрей Сулагаев, Артем Путяков тата ыттисен ашшĕсем ачисен çитĕнĕвĕнче хăйсен хавхалантарăвне туйни те сисĕнет.