Октябрĕн 10-мĕшĕнче Чăваш Республикин шалти ĕçсен министрĕн çумĕ, полици подполковникĕ Дмитрий Андреев РФ ШĔМĕн районсем хушшинчи "Батыревский" уйрăмĕн коллективне çĕнĕ начальникпе - полици подполковникĕпе Андрей Ларьковпа - паллаштарнă.

Патăрьел тата Шăмăршă районĕсенчи право хуралĕн çĕнĕ ертỹçине Патăрьел район администрацийĕн пуçлăхĕн тивĕçĕсене вăхăтлăх пурнăçлакан Светлана Чернова, район прокурорĕ Андрей Афанасьев ĕçре ăнăçусеем суннă.

 Пĕлме

 Андрей Ларьков 1978 çулта Улатăр хулинче çуралнă, çемьеллĕ, мăшăрĕпе икĕ ывăл çитĕнтереççĕ.

Аслă пĕлỹллĕ юрист, РФ ШĔМĕн Чул хулари академин Шупашкарти филиалĕнче пĕлỹ илнĕ. Ĕç стажне 1999 çулхи июльте Улатăрти шалти ĕçсен пайĕн, уголовлă шырав уйрăмĕнче оперуполномоченнăй должноçĕнчен пикеннĕ, каярахпа - милицин участокри уполномоченнăйĕсен уйрăмĕн начальникĕн çумĕ. 2011 çултанпа вăл ертсе пыракан должноçсенче тăрăшнă: уголовлă шырав уйрăмĕн начальникĕ, уйрăм начальникĕн пĕрремĕш çумĕ - криминаллă милицин начальникĕ, уйрăм начальникĕн çумĕ - РФ ШĔМĕн районсем хушшинчи "Алатырский" уйрăмĕн полици начальникĕ. 2021 çулхи декабрьтен Андрей Ларьков РФ ШĔМĕн районсем хушшинчи "Батыревский" уйрăмĕнчи полици начальникĕн çумĕ пулса ĕçленĕ. Октябрĕн 10-мĕшĕнче ăна РФ ШĔМĕн районсем хушшинчи "Батыревский" уйрăмĕн начальникĕ пулма çирĕплетнĕ.

 (Хамăр корр.)