ИРТНĔ эрнере Çĕрпỹ хулинче республикăри пенсионерсен пĕрлĕхĕн правленийĕн анлă ларăвĕ иртнĕ. Унта аслă ăру çыннисен обществăлла организацийĕн тăхăр уйăхри ĕçне пăхса тухнă. Анлă ларăва Патăрьел районĕнчи пенсионерсен пĕрлĕхĕн ертỹçи Полина Логунова та хутшăннă, Юхмапа Пăла тăрăхĕнчи пенсионерсен организацийĕн ĕçĕ-хĕлĕ пирки отчет туса панă.

 Районти пенсионерсен пĕрлĕхĕ республикăра кăтартуллисенчен пĕри. Тивĕçлĕ канăва тухнисем общество пурнăçĕнче те, спортра та, культура сцени çинче те тăтăшах хăйсен пултарулăхне кăтартаççĕ, акцисене хастар хутшăнаççĕ тата ытти те. Иртнĕ уйăхра районти пенсионерсен обществăлла организацийĕ "Чыс та мухтав аслă ăрăва" уйăхлăхра та пуçарулăх кăтартнă. Шăпах çакăншăн районти пенсионерсен пĕрлĕхĕн председательне Полина Леонидовнăна республикăри пенсионерсен пĕрлĕхĕн Тав хучĕпе чысланă.