Çитес çуркунне калча ỹстерме тăпрана хатĕрлесе хума манмалла мар.

 Шултра алапа алланă тăпрана, çĕрĕк тăприне торфпа, çерем тăприпе пĕр пек виçепе хутăштармалла. Пĕр витре çак хутăш пуçне пĕр килограмм хăйăр, вĕри шывра пăшăхтарнă вĕтĕ пăчкă кĕрпи, 1-2 стакан кĕл, икĕ апат кашăкĕ суперфосфат хушмалла. Ăна кирек мĕнле савăта тултарса хумалла. Капла упрама ансатрах. Çакнашкал пулăхлă тăпрара çуркунне калча питĕлайăх ỹсет.

Виçĕ çул усă курма

Сад-пахчара усă курмалли полиэтилен пленкăна хĕллехи вăхăтра патак çине чĕркесе 10 градусран ытла сивĕ мар тĕттĕм вырăнта упрамалла. Çакăн пек тусан унпа виçĕ çул усă курма пулать.

Çуллахи вăхăтра йывăç-тĕме, йăрансене тĕрлĕ имçам сирпĕтнĕ чухне ирĕлтернĕ супăнь хушсан унăн хăвачĕ вăйланать.

Ансат тапă

Тĕп сакайĕнче е нỹхрепре шăши самаях тарăхтарать. Алă айĕнче вĕсене пĕтермелли хими препарачĕ пулмасан çак меслет пулăшма пултарать.

 Виçĕ литрлă кĕленче банкăна тĕпне йĕпетмеллĕх тип çу ямалла. Савăта çĕр улми купи ăшне улма шайĕпе тан туса вырнаçтармалла. Çу шăршине туйса шăшисем хăйсемех чупса пыраççĕ. Банкăна лекнĕскерсем урисем çупа вараланнине пула унтан тухаймаççĕ.

Банкăсене тĕрĕслесех тăмалла. Унта лекнĕ шăшисене кăларса илнĕ хыççăн савăта каллех çав вырăна лартмалла.