"ШĂМĂРШĂ хыпарĕ" хаçат редакцийĕнче ĕçлесе тивĕçлĕ канăва тухнă Иван Медведев журналиста хаçат вулаканĕсем ытларах повеçсемпе калавсем ăста çырнипе пĕлеççĕ. Унăн хайлавĕсем пирĕн хаçатра та сахал мар пичетленеççĕ. Унсăр пуçне Рязаньти культура институтĕнче пĕлỹ илнĕ специалист хăех юрăсем çырать, вĕсене кĕвĕлет. Ку таранччен унăн çирĕм ытла юрă çуралнă. Нумай пулмасть Аслă Чемен чăвашĕ Патăрьел районĕ 95 çул тултарнине халалласа "Батыревский край" вырăсла юрра кун çути парнеленĕ. Иван Ананьевичăн тарăн шухăшлă тата хитре кĕвĕллĕ юррине хамăрăн ентешĕмĕр, Красномайскинче çуралса ỹснĕ ытарайми Фарида çийĕнчех халăх çине кăларма пултарнă. Чăвашла, вырăсла, тутарла илемлĕн шăрантаракан уçă та янăравлă саслă юрăç ăна студире хăй вăйĕпех çыртарнă, Патăрьелсен ентешлĕх уявĕнче хăнасене çак юрăпа пĕрремĕш хут савăнтарма та ĕлкĕрнĕ.