ПАТĂРЬЕЛĔНЧИ централизациленĕ библиотека çумĕнче йĕркеленĕ "Çамрăк çемьесен клубĕн" (ертỹçи Ольга Моисеева) хастарĕсем районти мероприятисене хутшăннипе çеç çырлахмаççĕ, республикăрисене те хутшăнаççĕ. Нумай пулмасть Валентинăпа Виктор Петровсем Чăваш Республикинчи Хĕрарăмсен канашĕ вулавăшсемпе тачă çыхăнса йĕркеленĕ юмах лартма кăмăллакан пуканесен клубне явăçса хăйсен çемйипе "Виçĕ сысна çури" ("Три поросенка") юмах лартса панă. Çемьене аталанма, вулавăшпа тачă çыхăну тытма пулăшакан республикăри Хĕрарăмсен канашĕн проектне Петровсем пилĕк çулхи Елизаветăпа тата виççĕри Элеонорăпа тепĕр хут хутшăннă. Хальхинче вĕсем "Йăвача" ("Колобок") юмаха пĕчĕк чиперккисемпе выляса панă. Çывăх вăхăтра çак çемьен пултарулăхне республикăри Хĕрарăмсен канашĕ çумĕнчи ыр кăмăллăх фончĕ хак парĕ.