ЮХМАПА Пăла тăрăхĕн маттур та ĕçчен, пултаруллă ывăл-хĕрĕ район тулашĕнче те чылай. Вĕсем кашниех хăйсен хастарлăхĕпе ят-сум çĕнсе илнĕ. Çак кунсенче Шăнкăртамра çуралса ỹснĕ, хальхи вăхăтра Канашра пурăнакан Гелфися Насырова предприниматель пирки редакцие ырă хыпар çитрĕ. Ульяновскинчи кооператив техникумĕнче пĕлỹ илнĕ çамрăк специалист чĕрĕк ĕмĕр каяллах хăйĕн ĕçне уçнă. Паян вĕсем çемйипех бизнеса аталантарас ĕçре вăй хураççĕ. Çав вăхăтрах налуксене вăхăтра тỹлесе пыраççĕ, ыр кăмăллăх акцийĕсене хутшăнаççĕ тата ытти те. Ахальтен мар çак кунсенче çеç виçĕ ача амăшне ĕçри, общество пурнăçĕнчи пысăк хастарлăхшăн Чăваш Республикин Патшалăх Канашĕн Хисеп грамотипе чысланă, мăшăрĕпе иккĕшĕн ячĕпе вара Хусан хулинче вырнаçнă Раççейри "Татарский фонд" ертỹçи çемье йăли-йĕркине, халăх культурине упранăшăн, аталантарнăшăн, ыттисемшĕн ырă тĕслĕх пулнăшăн Тав хучĕпе саламланă.