Чăваш Республикин Пуçлăхĕ Олег Николаев тỹрĕ лини вăхăтĕнче мобилизацие лекнисен çемйисене пулăшассипе çыхăннă ыйтусене уçăмлатрĕ. Вăл палăртнă тăрăх, республикăра мобилизаципе кайнисене, вĕсен çемйисене, контрактниксене, ятарлă çар операцийĕнчен таврăнакансене пур енлĕн пулăшĕç.

Мобилизациленнисен 99 проценчĕ (ноябрĕн 16-мĕшĕ тĕлне) республика бюджетĕнчен пĕр хут паракан тỹлеве (50 пин тенкĕ) илнĕ, çывăх вăхăтра ыттисене те куçарса парĕç.

Олег Николаев пĕлтернĕ тăрăх, мобилизаципе лекнисен ачисем кружоксемпе секцисене тỹлевсĕрех çỹрĕç, стипенди парĕç, вĕсене шкулта вĕри апатпа тивĕçтернишĕн тата садике çỹренишĕн те укçа илмĕç. Çакнашкал çемьесен социаллă паспорчĕсене туса хатĕрленĕ. Вĕсем юридици пулăшăвне те тỹлевсĕр илееççĕ.

Сăмах май каласан, мобилизациленисен çемйисене тивĕçекен пулăшусем пирки 122 номерпе шăнкăравласа е help21.ru сайтра кĕрсе те пĕлме пулать.