Çут çанталăкра тĕрлĕ инфекци аталанма пултарать. Вĕсем чĕрчунсен организмне лекеççĕ. Кайăк-кĕшĕк, кăшлакан чĕрчунсем, юн сăхаканскерсем вара чире сарма тата ыттисене ертме май параççĕ. Выльăх-чĕрлĕхпе чĕрчунсенчен куçакан инфекци сарăлас хăрушлăх пирĕн республикăра сыхланса тăрать-ха. Уйрăмах çуркуннехи-кĕркуннехи тапхăрта сыхă пулмалла

Шăнкăртам ял тăрăхĕнче çут çанталăк пулăмĕпе çыхăннă инфекцие пула (ГЛПС) пỹре сиенленнĕ пĕр тĕслĕх пулнă. Пĕлтĕр тата виçĕм çул районта çакнашкал чир палăрман.

Кăçал районти пĕр çынна сăвăс тапăннă. Пациент каллех Шăнкăртам ял тăрăхĕнчен пулнă. 2017 çултанпа çакнашкал тĕслĕх пулманччĕ.

Йытă çыртассинчен пăрăнаймастпăр-ха. Кăçал çеç 37 çын шар курнă. Вăл шутра вĕсем Шăнкăртам ял тăрăхĕнче 7, Патăрьел ял тăрăхĕнче 4, Çĕньял, Первомайски, Туçа, Турхан, Нăрваш Шăхаль ял тăрăхĕсенче виçшер, Çĕнĕ Ахпỹрт, Кзыл Чишма, Пикшик, Пăлапуç Пашьел, Сăкăт ял тăрăхĕсенче пĕрер çынна тапăннă. Ытларах чухне хуçасăр йытăсем сехĕрлентереççĕ. Пĕр çынна вара тилĕ тапăннă.

Инфекци чирĕсем ан сарăлччăр тесен мĕн тумалла-ха? Хамăр пурăнакан тавралăха ашкăрса ỹсекен курăксенчен тасатмалла. Хуралтă-çурт таврашне те кирлĕ мар çỹп-çапран тасатса тирпейлемелле. Вĕсен çывăхĕнче йĕкехỹре тавраш ан ĕрчетĕр.

Кăшлакан чĕр чунсем апат-çимĕç упранакан вырăна ан иленччĕр. Вĕсене пĕтерес тесен дезинфекци тумалла тата наркăмăш памалла. Сăвăс çыпăçассинчен, вăрăмтунасем тапăнассинчен хăтăлма сĕнекен препаратсем те пур. Таса юхан шывра çеç шыва кĕмелле. Çăвара шыв çăтма юрамасть. Вăрманта уçăлса çỹренĕ чухне таса уçланкă суйласа илмелле. Утă-улăм упранакан çĕре канма вырнаçмалла мар. Ĕçмелли шывпа апат-çимĕçе хупă савăтра тытмалла. Пахча çимĕçрен салат хатĕрленĕ чухне технологие пăхăнмалла, пăсăлма пуçланине апатра усă курмалла мар. Пĕлмен çăлкуçран шыв ĕçме те, алă çума та, савăт-сапана чỹхеме те юрамасть. Вĕретнĕ шыва е ятарлă савăтрине çеç ĕçĕр. Пĕлмен йытăпа, кушакпа, тискер чĕр чунпа ан çывăхланăр. Вилнĕ тискер кайăка та алăпа ан тытăр.

О.ТАКМАКОВА, "Роспотребнадзор" управленийĕн территори пайĕн начальникĕ