Полици сотрудникĕн профессийĕ хисеплĕ çеç мар, теветкеллĕ те. Вĕсем преступниксемпе уçă кĕрешĕве кĕнĕ чухне кашнийĕнчех хăйсене хăрушлăха кĕртсе ỹкереççĕ. Шел, служба тивĕçне пурнăçласа çуралнă çапăçусем çухатусăр та пулмаççĕ.

Шăп та лăп 45 çул каяллахи кĕркунне районти çул-йĕр инспекторĕ (ун чухне ГАИ тенĕ) Алексей Васильевич Портнов милици старшини те хăйĕн ĕçне тỹрĕ чунпа пурнăçласа "Шупашкар -Ульяновск" аслă çул çинче груз турттаракан автомашинăпа пыракан ỹсĕр преступниксен мăшкăлĕ пулса 27 çултах куçне ĕмĕрлĕхех хупнă... Усал ĕçĕ акă мĕнлерех пулса иртнĕ.

 Инспектор аякранах çулпа унталла та кунталла пăркаланса килекен грузовике асăрханă хыççăн чарăнма ыйтнă. Водитель çак паллăна нимĕн вырăнне те хуман, малалла тата хытăрах ыткăннă. Дежурствăри çул-йĕр инспекторĕ çак пуçтах авари тума пултарасса шута илсе ăна хăваласа çитнĕ, служба машинипе таркăнăн çулне пỹлсе хунă. Кабинăра виçĕ арçын ларнă, пурте ỹсĕр. Паллах, хăйĕн тивĕçне пурнăçласа А. Портнов чăн малтанах водителĕн докуменчĕсене тĕрĕсленĕ, ăçта çула тухнипе кăсăкланнă. Ỹсĕр водителе тепĕр кунхинех районти шалти ĕçсен пайне пыма ыйтнă. Çакă килĕшмен курăнать преступниксене, вĕсем машинăран сиксе аннă та милици сотрудникне вилмеллех хĕнесе пĕтернĕ...

Алексей Портнов тăван ялĕнче, Кивĕ Катек масарĕнче, ĕмĕрлĕх канлĕх тупнă. Служба тивĕçне пурнăçласа паттăрлăх кăтартнă инспекторăн сăн ỹкерчĕкĕ РФ ШĔМĕн районсем хушшинчи "Батыревский" уйрăмĕнче, мрамортан тунă ỹкерчĕкĕ вара Чăваш Республикинчи шалти ĕçсен министерствин çуртĕнче служба тивĕçне пурнăçласа паттăрла вилĕмпе куç хупнисене ячĕпе уçнă стендра упранать.

Районти шалти ĕçсен службин, ГИБДД сотрудникĕсем паян та А. Портновăн ятне чыслăн упраççĕ. Унăн пархатарлă та ырă ĕçне асрах тытаççĕ. Çак тĕллевпех РФ ШĔМĕн районсем хушшинчи "Батыревский" уйрăмĕн ГИБДД пайĕн начальникĕ Алексей Мальцев, ГИБДДăн хисеплĕ ветеранĕ Федор Урмаков шалти ĕçсен службин тивĕçне пурнăçласа пуç хунă паттăрсене асăнмалли кунхине Алексей Васильевичăн мăшăрĕпе тата ывăлĕпе вăл канлĕх тупнă масарта пулнă, вил тăпри çине чечек кăшăлĕ хунă, паттăра хисеп туса пуç тайнă. Çак масартах канлĕх тупнă ГАИ начальникĕ пулса тăрăшнă Ф. Майринпа взвод командирĕ Ф. Кошкин вил тăприсем умĕнче те пуç тайнă.

- Алексей Васильевич çул-йĕр инспекторĕ хăйĕн службăри тивĕçне тỹрĕ чунпа пурнăçлани пирĕншĕн ырă тĕслĕх, хамăрăн профессие тата ытларах хисеплеме хистет. Вăл яланах пирĕн асра. Паттăрсен ячĕсем вилĕмсĕр,-тенĕ Алексей Юрьевич паттăрăн вил тăпри умĕнчи кĕске калаçăва пĕтĕмлетсе.

 А. ЕГОРОВА.