ЧĂВАШ Республикин Пуçлăхĕн Олег Николаевăн хушăвĕпе килĕшỹллĕн ноябрĕн 26-мĕшĕнче Чăваш тĕррин кунне паллă тăватпăр. Уявăн тĕллевĕ - тăван халăхăн культурине, тĕрĕ ăсталăхне аталантарасси, пултаруллă тĕрĕ маçтăрĕсене тупса палăртасси тата ытти те. Çак тĕллевпе кашни çулах республикăра та, районта та тĕрлĕ мероприяти иртереççĕ, тĕрĕ ăстисен ĕçне пахалаççĕ. Ку тĕлĕшпе социаллă тетелте те кăсăклă ĕçсем пулаççĕ. Акă, хальхи вăхăтра республикăри Наци музейĕ йĕркеленипе "Эпĕ тата чăваш тĕрри" флешмоб вăй илсе пырать. Унта Юхмапа Пăла тăрăхĕнчи тĕрĕ маçтăрĕсем те хутшăнаççĕ. Алă ăстисем хушшинче ачасем те, аслисем те пур. Флешмоба хутшăнас текенсем çак кунччен тĕрĕсемпе эрешленĕ наци тумĕпе сăн ỹкерчĕксем лартма, хăйсен тĕррисен капăрлăхне кăтартма пултараççĕ. Контактра е Телеграмра #яичувашскаявышивка хэштегпе нумай сасă пухнисене музей сăн ỹкерчĕксен коллажне туса хăйĕн сайтне вырнаçтарать, çĕнтерỹçĕсене акци йĕркелỹçинчен парне кĕтет. Апла пулсан флешмоба хастартарах хутшăнар!