"Единая Россия" парти пуçарнипе йăлана кĕнĕ "Хăюлăх арчи" акци иртнĕ. Мероприятие хутшăнса ноябрĕн 18-мĕшĕнчен пуçласа декабрĕн 5-мĕшĕччен Патăрьелĕнчи тĕп больницăри ача-пăча уйрăмĕнче выртакан тата ача-пăча консультацине килекен пепкесем валли канцеляри таварĕсем, теттесем, кĕнекесем пухнă.

Акцие Патăрьелĕнчи пĕрремĕш тата иккĕмĕш, Шăнкăртамри пĕрремĕш тата Э. Феизов ячĕллĕ, Тутар Сăкăтĕнчи, Турханти, Туçари, Сăкăтри, Аслă Чементи, Ыхра Çырминчи, Пăлапуç Пашьелĕнчи, Нăрваш Шăхалĕнчи, Митта Ваçлейĕячĕллĕ Первомайскинчи, Хирти Пикшикри, Алманчăри, Г. Айхи ячĕллĕ Çĕньялти, Ишлĕри, Кивĕ Ахпỹртри, Çĕнĕ Ахпỹртри шкулсем, Патăрьел муниципалитет округĕн 1-мĕш созывĕн депутачĕсен Пухăвĕн депутачĕсем Николай Тинюков, Анатолий Казачков, Зефар Сабитов, Гелсирень Абейдуллова, Наталия Андреева, "Единая Россия" партин политканашĕн вырăнти членĕ Ильдар Камалетдинов тата ыттисем те хутшăннă. Турă амăшĕн Державная иконĕ ячĕллĕ Патăрьелĕнчи чиркĕвне çỹрекенсем те (храм ностоятелĕ Александр Синяков иерей) пулăшу сĕнекенсенчен пĕрремĕшсем пулнă.

Гелсирень Абейдуллова, Патăрьел муниципалитет округĕн депутачĕсен Пухăвĕн депутачĕ, Шăнкăртамри пĕрремĕш вăтам шкул директорĕ:

- Акци тĕллевĕ - ача-пăча уйрăмĕнче сипленекен пĕчĕк ачасене хавхалантарасси. Эпир пурте - анне-атте, асанне-асатте. Çавна май сиплев учрежденинче чылай вăхăт выртакан ачасене сывалма хавас кăмăл тата хăтлăх пысăк вырăн йышăннине питĕ лайăх пĕлетпĕр. Акцие пирĕн шкулти вĕрентекенсемпе вĕренекенсем çулленех кăмăлпа хутшăнаççĕ, çапла майпа пациентсене хавхалантарма тăрăшаççĕ. Часах Çĕнĕ çул, ачалăхра кашнийĕ асамлăха, Хĕл Мучипе Юр пикене ĕненнĕ. Çак акци уява больницăра ирттерме тивнисен асĕнче ырă аса илỹсем хăварасса шансах тăратпăр. Вĕсем те ỹссе çитсен пулăшу кирлисене алă тăсса парĕç...

- Çĕнĕ çул тата Раштав умĕн йĕркелекен ырă кăмăллăх акци аслисене те хавхалантарать пулсан пĕчĕккисемшĕн тата пĕлтерĕшлĕрех. Ку чăнах та пепкесемшĕн те, ашшĕ-амăшĕшĕн те - юмах евĕр. Пиртен кашнийĕ асамçă пулма, ачасене асамлăх парнелеме пултарать. "Единая Россия" парти пуçарнипе йĕркеленĕ черетлĕ "Хăюлăх арчи" ыр кăмăллăх акци больница коридорĕнчи ачасене савăнăç парнелерĕ, кашни пĕчĕк пациент хăйне килĕшнĕ парнене илчĕ. Ачан телейлĕ куллинчен хаклăраххи ку тĕнчере урăх нимĕн те çук пуль... - тесе палăртнă Патăрьелĕнчи тĕп больницăн тĕп врачĕ, Патăрьел муниципалитет округĕн депутачĕсен Пухăвĕн председателĕ Николай Тинюков акцие хутшăннисене тав тунă май.

(Хамăр корр.)