Кăçалхи хĕл кунĕсем пире пур енлĕн тĕрĕслеççĕ темелле. Иртнĕ канмалли кунсенче те юрпа хутăш çумăр çунине пула çул-йĕр ĕçченĕсемпе электриксене çăмăл килмерĕ. Хальхинче те (маларах та çапла пулнăччĕ) электролинисем татăлса пĕтрĕç, станцисем ĕçлеме чарăнчĕç, çавна пула кашни ялта тенĕ пекех вăхăтлăха çутăсем пулмарĕç, Патăрьелĕнче шыв насусĕсем те ĕçлеймерĕç. Çутçанталăк пăтăрмахне вăраха тăсмасăр сирес тĕллевпе электриксен ятарлă ултă бригади талăкĕпех ĕçлерĕ, ĕнер те хăш-пĕр кăлтăксене пĕтерес тĕллевпе тимлерĕ.

Республика, район çулне пăхса тăракансем те канмалли кунсенче инкек пулас хăрушлăха сирес тĕллевпе хăйăрпа тăвар хутăшне çулсем, тротуарсем çине сапсах тăчĕç, аварипе çыхăннă инкек-синкек пулман. Çапах та ял тăрăхĕсенче кассем хушшинчи çулсене пăхса тăракансен ку тĕлĕшпе яваплăха ỹстермелле, юра вăхăтра тасатса, çулсене сапсах тăмалла.

Г. КАЛЛИН, район администрацийĕн ятарлă программăсен пай пуçлăхĕ