ç 2023 çулхи январĕн 12-мĕшĕнче Раççей прокуратури 301 çул тултарать. Паян Патăрьел район прокуратури право хуралĕнче пысăк ĕç туса пырать. Вĕсем Юхмапа Пăла тăрăхĕнчи граждансен социаллă правине тата ирĕклĕхне, вĕсен саккунлă интересĕсене тĕрĕслĕх, принциплăх енĕсене тĕпе хурса хỹтĕлеççĕ.

Хальхи вăхăтра Патăрьел район прокуратурине юстици советникĕ А. Афанасьев ертсе пырать. Маларах вăл çак системăрах Тăвай, Елчĕк, Комсомольски районĕсенче тĕрлĕ должноçра тăрăшнă. Прокурорăн çумĕ А. Забиров, прокурорăн аслă пулăшуçи А. Красина, прокурорăн пулăшуçи К. Андреев, çак системăра 20 çул ытла тăрăшакан Н. Ляллина тĕп специалист, Ю. Ядуркин водитель кашниех хăйсен тивĕçне тỹрĕ чунпа тата кăмăлтан пурнăçласа пыраççĕ.

Прокуратура органĕн паянхи ĕçĕ кашни сферăпах çыхăннă: ĕç хутшăнăвĕсем, патшалăх тата муниципаллă çăмăллăхĕсем, çутçанталăка сыхласси, сывлăх сыхлавĕ, вĕрентỹ, культура, преступлени ыйтăвĕпе профилактика тăвасси тата ытти ыйту та. Çав вăхăтрах граждансен ыйтăвне вăхăтра татса парасси те тĕп вырăнта. Ку тĕлĕшпе йĕрке хуралĕн органне кашни кун тенĕ пекех тĕрлĕрен ыйту кĕрет. Çавна май прокуратура сотрудникĕсем вĕсене ĕç вырăнĕнче те йышăнаççĕ, вырăнсене тухса тĕл пулу та йĕркелеççĕ. Прокурор патне электронлă майпа йышăнăва çырăнасси те пурнăçланса пырать. Акă, 2022 çулта Патăрьел район прокуратури граждансенчен кĕнĕ 350 ыйтăва пăхса тухса тивĕçлĕ йышăну тунă.

Иртнĕ çул прокурор тĕрĕслевĕ хыççăн следстви органĕсем 3 уголовлă ĕç пуçарнă. Унсăр пуçне прокуратура 150 ытла уголовлă ĕçпе айăплава ырланă. Сотрудниксем йывăр тата уйрăмах йывăр преступленипе, коррупци сĕмĕпе çыхăннă ĕçсемпе уйрăмах тимлĕ ĕçленине те палăртмалла. Прокуратура коллективĕ Çĕнĕ çулта та çирĕп йĕркешĕн, халăхăн тăнăç пурнăçĕшĕн, ырă малашлăхшăн тăрăшĕ.

А. ЕГОРОВА.