ЮЛАШКИ çулсенче пирĕн тăрăхра арçын ачасем çеç мар, хĕрачасем те спорт каçалăкĕнче ỹсĕм хыççăн ỹсĕм туса савăнтараççĕ. Вăл шутра каратэ енĕпе те çитĕнỹсем начар мар. Акă, Çĕнĕ çулăн малтанхи кунĕсенче Саранск хулинче Раççейре традициллĕ каратэ енĕпе мала тухассишĕн чемпионат иртнĕ. Помост çинче кĕрешỹ ăсталăхне кăтартакансем çĕршывăн тĕрлĕ кĕтесĕнчен пуçтарăннă. Çапах та Патăрьелĕнчи "Паттăр" ФСКри ачасемпе çамрăксен спорт шкулĕн хастарĕ Ксения Никитина кумитэ меслечĕпе кĕрешсе 16-17 çулхи çамрăксем хушшинче ылтăн медаль çĕнсе илме пултарнă. Раççей шайĕнчи çĕнтерỹ, паллах, чăн малтанах чиперккен çирĕп вăй-халĕн, чăтăмлăхĕн результачĕ. Спортсменкăн çитĕнĕвĕнче Олег Камышов тренерăн тивлечĕ те пысăк.