"Авангард" хаçатра Çĕнĕ çулпа Раштав уявĕсем умĕн Юхмапа Пăла тăрăхĕнчи предприятисенчи, организацисенчи, учрежденисенчи ĕç коллективĕсем, уйрăм çынсем хушшинче творчество ăсталăхне аталантарас, вĕсене культурăллă массăллă мероприятисене явăçтарас, çав вăхăтрах хамăр пурăнакан тавралăха хăтлăх кỹрес тата капăрлатас тĕллевпе "Çĕнĕ çулхи çутăсен асамлăхĕ" конкурс йĕркеленине пĕлтернĕччĕ ĕнтĕ.

Ăна икĕ номинаципе хакланă: "Уяв сĕмне кĕртнĕ чи лайăх территори" ("Лучшее праздничное оформление прилегающей территории" тата "Чи лайăх арт-объект" ("Лучший арт-объект").

Çĕнĕ çул çутипе капăрлатнă чи лайăх территорисен шутне Патăрьелĕнчи пĕрремĕш, Пăлапуç Пашьелĕнчи вăтам, Турă Амăшĕн иконĕ ячĕллĕ Патăрьелĕнчи храм, уйрăм хушма хуçалăхсенчен Алманчăри Валерий тата Светлана Хадаровсен çурт-йĕрĕ кĕнĕ.

"Çĕнĕ çулхи çутăсен асамлăхĕ" конкурсра Нăрваш Шăхалĕнчи вăтам шкул, Первомайскинчи "Шуçăм" ача сачĕ, Кивĕ Ахпỹртри пĕтĕмĕшле пĕлỹ паракан тĕп шкул тата Нăрваш Шăхалĕнчи Павел Белков хуçалăхĕ иккĕмĕш, Патăрьелĕнчи "Василек" ача сачĕ, Аслă Чементи вăтам шкул тата Аслă Чементи Светлана Кошелева хуçалăхĕ виççĕмĕш вырăнсене тухнă.

Çавăн пекех комисси Алманчăри ял клубĕ, Патăрьел тата Пăлапуç Пашьел ял тăрăхĕсем, Патăрьелĕнчи "Центральнăй", "Сказка" ача сачĕсем, районти централизацилелĕ клуб тата библиотека системисем, "Бизнес-инкубатор", патшалăх тата муниципаллă çăмăллăхсем паракан нумай функциллĕ центр, "Чăваш энергосбыт компанийĕ", Мăшăрлану керменĕ, "Батыревский" пĕрлешỹ, "Булат", "Империя" суту-илỹ çурчĕсем, "Авангард" хаçат редакцийĕ, "Россельхозбанк", Туçари Шайко, Çĕньялти Живовсен, Шăхачри Мыловсен, Патăрьелĕнчи Вахитовсен, Галялетдиновсен, Кузнецовсен, Михалуковсен хуçалăхĕсем çутăсен асамлăхĕпе туллин усă курнине палăртнă.

Çакна та палăртса хăвармалла. Çĕнĕ çулпа Раштав уявĕсем умĕн чунсенче ырă туйăм çуратма, кăмăлсене хăпартма йĕркелекен йăлана кĕнĕ конкурса хăшĕсем хапăл туса йышăнманни, хатĕрленменни шухăшлаттарать те, пăшăрхантарать те...

А. НИКОЛАЕВА