Анат Туçара пурăнакансем çулленех Раштавра ял уявне паллă тăваççĕ. Йăлана кĕнĕрен кăçал та халăх пуçламăш шкул-садăн акт залне пухăнчĕ. Кăрлач сивви никамăн кăмăлне те хуçмарĕ.

Уявсен ячĕпе ял старости Эдик Беззубов, "ЛУК-АГРО" кооператив ертỹçи Валерий Кузнецов, Николай Перепелкинпа Валерий Салмин ĕç ветеранĕсем саламларĕç. Валерий Леонидович кооперативра тăрăшса ĕçлекенсене Хисеп хучĕсемпе, парнесемпе чысларĕ. Ăна Юрий Батманов, Сергей Торговцев, Сергей Ларионов, Сергей Казаков, Дмитрий Немцев, Юрий тата Венера Беззубовсем тата ыттисем тивĕçрĕç.

Малалла сценăна юрă-сăвă ăстисем йышăнчĕç. Ялта çуралса ỹснĕ Юрий Воробьев хăйех пĕр концерт лартма хатĕр. Репертуарĕнче тĕрлĕ юрă пур. Галина Бушмакинăпа Елизавета Щукина та сцена ăстисем. Тус-тăванлăх юррисене хитре шăрантараççĕ.

Роман Перепелкин - эстрада юррисен артисчĕ. Тăван ял уявне манмасть. Тĕп хуларан çитнĕ. Вăтаелĕнчен Василий Сабаев килнĕ. Вăл хăй çырса кĕвĕленĕ юррисене шăрантарчĕ.

Анат Туçасене савăнтарма Туçари "Çăлкуç" ансамбль те килнĕ. Пурин çулĕсем шултăраланнă пулин те куракана пултарулăхĕпе тыткăнлаççĕ. Çамрăк юрăç та пур. Настя Бельдекова "Кỹршĕ ялта кукамай, тăван ялта асанне" юрра шăрантарчĕ. Вĕсене сцена çине тухма Виталий Глинкин купăсçă хатĕрлет.

Кỹршĕллĕ Елчĕк районĕнчен инçе çула çывăхлатса çитнĕ "Хĕлхем" ансамбль пултарулăхне те палăртмалла. Сцена çине тухма вĕсем ятарлă тумсем те çĕлеттернĕ. Халăх юррисене шăрантарнисĕр пуçне ку чухнехи эстрада юррисене те юрлаççĕ.

Туçасемпе Кивĕ Эйпеçсен хастарлăхне ыттисен илсен те юрать. Уяв ирттернин тепĕр ырă пулăмĕ вăл - юбилярсене саламлани. 50-90 çул çитнисене е çавра çул çывхарса пыракансене кашнине ятран асăнчĕç. Вуннăмĕш теçеткене вакланисене пỹрне хуçса шутлама та пулать.

Уяв кун шăпах Валентина Алексеевна Воробьева 90 çул тултарнă. Хисеплĕ ватта та уявра чысларĕç. Вăл çамрăксене хăй пек вăрăм ĕмĕрлĕ пулма пил пачĕ. Ывăлĕ вара "Аттепе анне пулсассăн пуринчен те эп пуян" юрăпа сцена çине тухрĕ.

Петрпа Светлана Беззубовсем кăçал пĕрлешнĕренпе 50 çул çитнине паллă тăваççĕ. Мăшăр ячĕпе те музыка саламĕ янăрарĕ.

Уява Лидия Платонова библиотекарь ертсе пычĕ. Юлашкинчен пурте пĕрле Олег Газмановăн "Вперед, Россия!" юррине шăрантарчĕç. Ăна тулли мар мобилизаципе çар операцине хутшăнакансен паттăрлăхне вырăна хурса юрларĕç.

 Спорт вăййисем те пулчĕç.

Канăва интереслĕ йĕркелеме те пулать иккен. Çакăнта ял старостин пуçарулăхĕ палăрчĕ. Ялта культура çурчĕ çукки малашлăхра та чăрмав ан кỹтĕр. Сцена ăстисен пултарулăхне пĕтме парас марччĕ.

А. АСТРАХАНЦЕВА