Январĕн 14-мĕшĕнче «Шупашкар-Арена» Пăр керменĕнче Раççей тата Чăваш пичечĕн кунĕсене халалланă уяв иртрĕ.

Унта «Авангард» хаçат журналисчĕсем те хутшăнчĕç.

Чăваш Ен Пуçлăхĕ Олег Николаев журналистсене, кĕнеке-хаçат кăларакансене, полиграфистсене, пичет ветеранĕсене уявпа саламланă май информаципе тивĕçтерсе тăрассипе çыхăннă ĕç хальхи саманара чи пĕлтерĕшлисенчен тата кирлисенчен пĕри пулнине палăртрĕ. Çавăн пекех Олег Алексеевич журналистсене ăсталăхне ÿстерес тĕллевпе яланах шыравра пулма, çĕнĕ çитĕнÿсем патне ăнтăлма сунчĕ. МИХне проект ĕçĕ-хĕлĕнче тĕрев  пуласси пирки те систерчĕ регион ертÿçи.

Чăваш Республикин цифра аталанăвĕн министрĕн тивĕçĕсене вăхăтлăх пурнăçлакан Екатерина Грабко пичет отраслĕн 2022 çулхи ĕçĕ-хĕлĕпе паллаштарнă май кăçалхи тĕллевсене те уçăмлатрĕ. Сăмах май каласан, паян республикăра 151 массăллă информаци хатĕрне шута илнĕ.

Пухăннисене çавăн пекех Чăваш Республикин Патшалăх Канашĕн Председателĕ Леонид Черкесов, Чăваш Республикин прокурорĕ Андрей Фомин, республикăри Хĕрарăмсен канашĕн председателĕ Наталья Николаева та уявсен ячĕсемпе саламларĕç, ĕçре палăрнисене Хисеп тата Тав хучĕсемпе чысларĕç.

Чăваш Енри Журналистсен союзĕн председателĕ Валерий Комиссаров 2022 çулхи ĕç-хĕлпе преми лауречĕсене пĕлтерни уяв сĕмне тата та ÿстерчĕ. Çемен Элкер ячĕллĕ премие «Советская Чувашия» хаçатăн тĕп редакторĕ  Владимир Васильев тата «Чăваш Ен» патшалăх телерадиокомпанийĕн корреспонденчĕ Вячеслав Ильин, Н.Никольский ячĕллĕ премие Чăваш Республикин Патшалăх Канашĕн «Республика» хаçачĕн корреспонденчĕ Владислав Николаев, Л.Ильин ячĕллĕ премие «Хыпар» издательство çурчĕн ача-пăча кăларăмĕсен редакторĕ Елена Атаманова тивĕçнĕ.

Уява хаваслă концерт программи илем кÿчĕ, пухăннисен кăмăл-туйăмне çĕклерĕ.

А. Иванов