Патăрьел муниципалитет округĕн пуçлăхĕ Рудольф Селиванов Патăрьел райпо Канашĕн председателĕпе Сергей Счетчиковпа тĕл пулнă. Вĕсем паянхи кун райпо умĕнче тăракан йывăрлăхсем тата малашлăхри тĕллевсем пирки калаçнă.

Январĕн 2-мĕшĕнче Пăлапуç Нурăсĕнче райпо лавкки çунса кайнă, çавна май ялта пурăнакансене куллен кирлĕ таварсене ăçтан туянасси пăшăрхантарнă. Тĕл пулура ку ыйтăва та хускатнă.

- Çывăх вăхăтра суту-илỹ çуртне тĕплĕн юсама пуçласшăн. Январĕн çурринче пуçласа февраль вĕçне ĕçе пĕтерме, март пуçламăшĕнче хута яма палăртатпăр. Патăрьел муниципалитет округĕн администрацине ял халăхне апат-çимĕç сутмалли вырăн тупса пама ыйтса çырупа тухрăмăр, - тесе пĕлтернĕ Сергей Счетчиков.

Рудольф Васильевич вăхăтлăха Пăлапуç Нурăс клубĕнче лавкка уçма май пуррине каланă. Ертỹçĕне палăртнă тĕллевсене пурнăçлама ăнăçу суннă.

(Хамăр корр.)