"Ырă пăр" проектпа килĕшỹллĕн йĕркеленĕ "Юрататăп аттепе аннене тата хоккея" фестивале хутшăнакансем малтанах Алексей Афанасьевич Кокель ỹнерçĕн, художник-педагогăн, профессорăн музей-çуртĕнче экскурсинче пулнă. Вăл çуралса ỹснĕ çурт регион пĕлтерĕшлĕ культура эткерлĕхĕн объекчĕ шутланать. Ăна патшалăхăн пĕрлĕхлĕ реестрне те кĕртнĕ.

Музей ĕçченĕсем хăнасене Алексей Афанасьевич пултарулăхĕпе, çурт историйĕпе паллаштарнă.

Çавăн пекех делегаци Афганистанта пуçне хунă Владимир Перлова хисеплесе уçнă Асăну хăми патне те çеçкесем хунă.

Турханти вăтам шкулта Патăрьелĕнчи ачасен ăсталăх çурчĕн директорĕ Алина Антонова фестиваль тĕлне хатĕрленĕ выставкăпа паллаштарнă.

Фестивале уçма Патăрьел муниципалитет округĕн пуçлăхĕ Рудольф Селиванов, Чăваш Республикин Патшалăх Канашĕн депутачĕ Валерий Антонов, "Ырă пăр" фондăн регионти Атăлçи представителĕ, "Сокол" хоккей клубĕн президенчĕ, СССР спорт мастерĕ, Чăваш Республикин тава тивĕçлĕ физкультура ĕçченĕ Олег Салтыков, округри депутатсен Пухăвĕн депутачĕсем, хăнасем, ял халăхĕ хутшăннă.

Рудольф Селиванов хăйĕн сăмахĕнче фестивале килнисене кивĕ Çĕнĕ çулпа саламласа пурне те спортра çитĕнỹ, сывлăх суннă. Çавăн пекех вăл Еленăпа Геннадий Тимченкосен ыр кăмăллăх фондне тав тунă, хоккей спортне аталантарас, халăха кăмăл-сипет тата патриотла воспитани парас ĕçе тивĕçлĕ тỹпе хывнăшăн Николай Михайлова, Владислав Михайлова тата Валерий Макарова "Патăрьел районне йĕркеленĕренпе - 95 çул" медальпе наградăланă.

Юлашки çулсенче Тимченко фончĕпе килĕштерсе тата тĕллевлĕ ĕçленĕрен Юхмапа Пăла тăрăхĕнче "Ырă пăр" проектпа килĕшỹллĕн ку чухнехи икĕ хоккей коробки - Первомайскинче тата Сăкăтра - йĕркеленĕ. Çĕнĕ Ахпỹртри "Олимп" тата Сăкăтри "Чайка" клубсен çамрăк хоккеисчĕсем валли хоккей экипировкисемпе тивĕçтернĕ тата ытти те.

 Фестивальте коньки сырса кăна мар, кăçатăсемпе те хоккейла выляса ăмăртнă. Спорт çемйисен турнирне йĕркеленĕ. Вĕсенче ачисемпе ашшĕ-амăшĕ спортăн çак енĕпе киленнĕ. Çавăн пекех хăнасемпе вăййа хутшăнакансен выляв площадкисем ĕçленĕ, каярах вĕри чейпе сăйланнă.

А. ИВАНОВА