ПАТĂРЬЕЛĔНЧИ "Паттăр" физкультурăпа спорт комплексĕнче кашни кунах çын йышлă. Тĕрлĕ çулхи шкул ачисем аэробикăна, ташă секцине, бассейна çỹреççĕ. Аслăраххисем спорт залĕнче, тренажер пỹлĕмĕнче тренировкăсем, ăмăртусем ирттереççĕ тата ытти те. Кашни кĕçнерникунах тивĕçлĕ канăва тухнисем В. Карягин тренер ертсе пынипе бассейнра ишеççĕ, хусканусем тăваççĕ. Иртнĕ шăматкун вара спорт комплексĕнче физкультурăпа спорта юратакансем кунĕпех йышлă пулнă. Уйрăмах бассейнра ишме çемьепе йышлăн килнĕ. Çав вăхăтрах пенсионерсем те пуçтарăннă. Республикăра кашни уйăхрах йĕркелекен "Сывлăх" кунĕнче çынсем пурте çăмăллăхсемпе тỹлевсĕр усă курнă.