КĂÇАЛХИ хĕл хăйне евĕр пулăмпа палăрса тăрать. Çанталăкăн начар кунĕсем çук теççĕ пулин те, ăшăтса илсе унтан тỹрех сивĕтсе пăрахнă хыççăн çулсем кĕленче евĕр пăрланса ларчĕç. Çул-йĕре пăхса тăракан организацисем автомашинăсем çỹрекен çулсене хăйăрпа тăвар хутăшне сапаççĕ-ха. Вырăн-вырăнпа Патăрьелĕнчи тротуарсене те çавăнпах сирпĕтсе хăварнă. Анчах та хăш-пĕр çĕрте нимĕн те мар шуса ỹкме, алă-урана хуçма е пысăк суран илме те пулать. Пăрлак çулпа патакпа утни те кăлăхах. Виççĕмĕш "ура" та шанчăклăн пулăшаймĕ. Уйрăмах автовокзал таврашĕнче, унăн çывăхĕнче çакăн пек йывăр лару-тăру пулнине шăнкăравласа пĕлтерчĕç хаçат редакцине.